වික්ටෝරියා ප්‍රාන්තයේ Property market එක තුළ බහුලව සිදුවන අවම මිල අඩු කොට දැක්වීමේ (Underquoting) නීති විරෝධී භාවිතය ඉවත් කිරීමේ අරමුණින් දැවැන්ත නව නීති මාලාවක් සම්මත කර තිබෙනවා.

මෙම නව පනත යටතේ නිවසක් වෙන්දේසි කිරීමට හෝ ස්ථිර විකුණුම් දිනයකට දින 7කට පෙර එහි අවම මිල (Reserve price) ප්‍රසිද්ධ කිරීමට දේපළ නියෝජිතයන්ට සහ විකුණුම්කරුවන්ට සිදුවනු ඇති.

පාරිභෝගික නීති සංශෝධන පනත (Consumer Legislation Amendment Bill) යටතේ ගෙන එන ලද මෙම නව නීතිය ලබන ඔක්තෝබර් 1 වනදා සිට ක්‍රියාත්මක වීමට නියමිතයි.

මීට පෙර වෙන්දේසියක් අතරතුරදී පමණක් හෝ ඇතැම් විට කිසිසේත්ම හෙළි නොකළ අවම මිල, මෙම නව නීතියත් සමඟ දින 7කට පෙර ප්‍රසිද්ධ කළ යුතු අතර, ‘X සිට’ හෝ ‘X සහ Y අතර’ වැනි අපැහැදිලි යෙදුම් භාවිත කිරීම තහනම් කෙරෙනවා.

එසේම, අන්තර්ජාල දැන්වීම්වල සංසන්දනාත්මක විකුණුම් සහ ප්‍රධාන ලක්ෂණ සහිත දේපළ මිල ප්‍රකාශයක් (PPS) ප්‍රදර්ශනය කිරීම අනිවාර්ය වන අතර, නීති කඩ කරන නියෝජිතයන්ගේ බලපත්‍ර අත්හිටුවීමට ද මෙහිදී ප්‍රතිපාදන සලසා තිබෙනවා.

කෙසේ වෙතත්, දේපළ වෙළඳපොළ වෘත්තිකයන් පෙන්වා දෙන්නේ මෙම දැඩි නීති හේතුවෙන් වෙන්දේසි ක්‍රමය අඩාල විය හැකි බවයි.

මිල පහත වැටෙන වෙළඳපොළකදී දින 7ක කාලයක් තුළ අවම මිල වෙනස් කිරීමට නොහැකි වීම විකුණුම්කරුවන්ට ගැටළුවක් වන බැවින්, බොහෝ දෙනෙක් වෙන්දේසි වෙනුවට වෙනත් විකුණුම් ක්‍රම වෙත යොමු විය හැකි බවටයි රියල් එස්ටේට් ආයතන අනතුරු අඟවන්නේ.

එහෙත් රජය පවසන්නේ First home buyers ආරක්ෂා කිරීම සඳහා මෙම පියවර අත්‍යවශ්‍ය බවයි.