ඔස්ට්‍රේලියානු ෆෙඩරල් රජය රට තුළ ගෑස් සැපයුම වැඩි කර මිල පාලනය කිරීමේ අරමුණින් නව Domestic Gas Reservation සැලැස්මක් ඉදිරිපත් කර තිබෙනවා.

නව යෝජනාව අනුව ගෑස් අපනයනකරුවන්ට තම නිෂ්පාදනයෙන් උපරිම 20%ක් දේශීය වෙළඳපොළ සඳහා වෙන් කිරීමට සිදුවන අතර, එය කලින් යෝජනා කළ ස්ථාවර 20%ක අනිවාර්ය වෙන්කිරීමෙන් වෙනස් වීමක්.

එම ප්‍රමාණය සියලුම අපනයනකරුවන්ට එකම ආකාරයෙන් නියම නොකරන අතර, කලාපීය වෙළඳපොළේ අවශ්‍යතාව අනුව Australian Energy Regulator විසින් තීරණය කිරීමට නියමිතයි.

මෙම ක්‍රමය හරහා වසරකට අමතර ගෑස් පෙටාජූල් 200ක් දක්වා දේශීය වෙළඳපොළට එක් කළ හැකි බවත්, එය ඉදිරියේදී පුරෝකථනය කර ඇති ගෑස් හිඟයට වඩා වැඩි සැපයුමක් වන බවත් රජය පවසනවා.

විශේෂයෙන් නැගෙනහිර වෙරළබඩ ප්‍රදේශවල දේශීය ගෑස් වෙළඳපොළට වැඩි සැපයුමක් ලබාදීමෙන් මිල ඉහළ යාමේ අවදානම අඩු කිරීමට හැකි වනු ඇති බවටයි රජය විශ්වාස කරන්නේ.

නව සැලැස්ම ක්‍රියාත්මක කිරීමේ දිනයද මාස හයකින් කල් දමා ඇති අතර, ගෑස් අපනයනකරුවන්ට නව දේශීය සැපයුම් වගකීම් සපුරාලීමට සිදුවන්නේ 2028 ජනවාරි 1 සිටයි.

කෙසේ වෙතත්, ගෑස් කර්මාන්තයේ පාර්ශ්ව කිහිපයක් අනතුරු අඟවා ඇත්තේ දේශීය වෙළඳපොළට අතිරේක සැපයුමක් පැමිණීමෙන් මිල පහළ යා හැකි නමුත්, නව ගෑස් ව්‍යාපෘති සඳහා ආයෝජන අඩුවීමේ අවදානමක්ද ඇති විය හැකි බවයි.