ඔස්ට්‍රේලියාවට පැමිණෙන සංක්‍රමණිකයන්ගේ සංඛ්‍යාව විශාල ලෙස අඩු කළහොත් ආහාර, භාණ්ඩ බෙදාහැරීම සහ තවත් සේවා රැසක මිල ඉහළ යා හැකි බවට සංක්‍රමණ විශේෂඥයන් අනතුරු අඟවනවා.

Home Affairs දත්ත අනුව 2026 ජූලි 31 වනවිට ඔස්ට්‍රේලියාවේ තාවකාලික වීසා හිමියන් මිලියන 2.9ක් සිට තිබෙනවා.

එම පිරිසට විදේශ සිසුන්, පුහුණු සේවකයන්, Working Holiday වීසා හිමියන්, සංචාරකයන් සහ නවසීලන්ත Special Category visa හිමියන් ඇතුළත්.

ඔස්ට්‍රේලියාවේ hospitality ක්ෂේත්‍රයේ සේවකයන්ගෙන් සියයට 40ක් පමණ විදේශ රටවල උපත ලැබූ පුද්ගලයන් වන අතර, රටේ ආහාර පිසින්නන් සහ සූපවේදීන්ගෙන් අඩකට ආසන්න පිරිසක්ද සංක්‍රමණිකයන් බව Grattan Institute විශ්ලේෂණ පෙන්වා දෙනවා.

කෘෂිකර්මාන්තය, මස් සැකසුම්, අවන්හල්, ආහාර නිෂ්පාදනය සහ භාණ්ඩ ප්‍රවාහනය වැනි ක්ෂේත්‍රවලද විදේශ සේවකයන් විශාල පිරිසක් සේවය කරනවා.

විශේෂයෙන්ම regional සහ rural ප්‍රදේශවල ගොවිපොළවල් Working Holiday සහ seasonal workersලා මත දැඩිව රඳා පවතින බවයි වාර්තා වන්නේ.

එම සේවකයන්ගේ සංඛ්‍යාව හදිසියේ අඩු කළහොත් ගොවීන්ට අස්වනු නෙළීම, ආහාර සැකසීම සහ වෙළෙඳසල් වෙත භාණ්ඩ ප්‍රවාහනය කිරීම සඳහා අවශ්‍ය සේවකයන් සොයාගැනීම අපහසු විය හැකියි.

එවිට සේවකයන් ලබාගැනීම සඳහා වැඩි වැටුප් ගෙවීමට සිදුවීමත්, නිෂ්පාදනය සහ බෙදාහැරීම ප්‍රමාද වීමත් නිසා එළවළු, පලතුරු, මස් සහ අවන්හල් ආහාරවල මිල ඉහළ යා හැකි බව විශේෂඥයන් පෙන්වා දෙනවා.

සෞඛ්‍ය සහ සමාජ සත්කාර ක්ෂේත්‍රයේ සේවකයන්ගෙන් සියයට 37ක් පමණ විදේශ රටවල උපත ලැබූ අය වන බැවින්, විශාල සංක්‍රමණ කප්පාදුවක් රෝහල් සහ වැඩිහිටි සත්කාර සේවාවලටද බලපෑ හැකියි.

කෙසේවෙතත්, සංක්‍රමණිකයන් අඩු කළහොත් ආහාර මිල අනිවාර්යයෙන්ම ඉහළ යන බවට නිශ්චිත අනාවැකියක් නැහැ.

#AustralianMigration #FoodPrices #CostOfLiving #MigrantWorkers #RegionalAustralia #AusLankaTV