අන්තර්ජාලය ඔස්සේ දරුවන් ගොදුරු කර ගැනීමේ උත්සාහයන් (online grooming) පිළිබඳව ඇඩිලේඩ් විශ්වවිද්‍යාලය විසින් සිදු කරන ලද නවතම පර්යේෂණයකින් කම්පන සහගත තොරතුරු අනාවරණය වී තිබෙනවා.

වයස අවුරුදු 10ත් 17ත් අතර ඔස්ට්‍රේලියානු දරුවන් 300ක් පමණ මෙම අධ්‍යයනයට සහභාගී කරගෙන ඇති අතර, ඉන් 66%කට ආසන්න පිරිසක් පසුගිය වසර තුළ අන්තර්ජාලය ඔස්සේ නාඳුනන පුද්ගලයන්ගෙන් යම් ආකාරයක grooming පණිවිඩ ලබාගෙන ඇති බවයි හෙළි වී ඇත්තේ.

මේ අතර දරුවන් 31%ක් ලිංගික ඉල්ලීම් හෝ යෝජනාවලට (solicitation) මුහුණ දී තිබෙනවා.

මෙම අධ්‍යයනයට නායකත්වය දුන් ඇඩිලේඩ් විශ්වවිද්‍යාලයේ ආචාර්ය Katie Logos සඳහන් කර ඇත්තේ, පොදු රුචිකත්වයන් ගැන කතා කිරීම, දරුවාගේ පෞද්ගලික ජීවිතය, සබඳතා හෝ අන්තර්ජාල ක්‍රියාකාරකම් ගැන ඇසීම වැනි විශ්වාසය ගොඩනඟා ගැනීමේ උපක්‍රම මෙහිදී බහුලව භාවිත වී ඇති බවයි.

“What school do you go to?”,“Do your parents check your phone?”,“Let’s move to a different platform” සහ “Send me a photo so I know who I’m speaking to” වැනි පණිවිඩ මඟින් දරුවන් හුදකලා කිරීමට සහ තොරතුරු රැස් කිරීමට අපරාධකරුවන් උත්සාහ කරන බව ද ඇය පෙන්වා දෙනවා.

වැඩිහිටියන් දරුවන් ලෙස පෙනී සිටිමින් කරන මෙවැනි සියුම් උපක්‍රම හඳුනාගැනීම දරුවන්ට අපහසු වී ඇති බවත්, ඇතැම් දරුවන් එවැනි අන්තර්ජාල සංවාද සාමාන්‍ය දෙයක් ලෙස සලකා නොසලකා හැර ඇති බවත් මෙම පර්යේෂණයෙන් අනාවරණය වී තිබෙනවා.