Optus ජංගම දුරකථන ජාලයේ ඇති වූ තවත් බිඳවැටීමක් හේතුවෙන් ඔස්ට්‍රේලියාවේ ප්‍රාන්ත කිහිපයක Triple Zero (000) හදිසි ඇමතුම් රැසකට බාධා එල්ල වී තිබෙනවා.

සිකුරාදා පස්වරු 1.30ට පමණ ආරම්භ වූ මෙම තාක්ෂණික ගැටලුව වික්ටෝරියා, දකුණු ඔස්ට්‍රේලියාව, ටැස්මේනියාව සහ Northern Territory ප්‍රදේශවල Optus පාරිභෝගිකයන්ට බලපා ඇති බවයි වාර්තා වන්නේ.

Triple Zero Victoria අනාවරණය කර ඇත්තේ වික්ටෝරියා ප්‍රාන්තයේ හදිසි ඇමතුම් 39ක් Telstra විසින් මෙහෙයවන ජාතික Triple Zero සේවාව සමඟ සම්බන්ධ වීමට අපහසුතාවකට මුහුණ දී ඇති බවයි.

ටැස්මේනියාවේද Triple Zero ඇමතුම් තුනකට මෙම බිඳවැටීම බලපා තිබෙනවා.

Optus සමාගම පවසන්නේ ගැටලුව හඳුනාගත් වහාම තාක්ෂණික කණ්ඩායම් යොදවා සේවාව හැකි ඉක්මනින් යථා තත්ත්වයට පත් කළ බවයි. ජාල බිඳවැටීමට නිශ්චිත හේතුව සම්බන්ධයෙන් තවදුරටත් පරීක්ෂණ සිදු කෙරෙනවා.

බාධාවට ලක්වූ හදිසි ඇමතුම් ලබාදුන් පුද්ගලයන්ගේ ආරක්ෂාව තහවුරු කිරීම සඳහා වික්ටෝරියා පොලීසිය welfare checks සිදුකරමින් සිටින බවද බලධාරීන් ප්‍රකාශ කර තිබෙනවා.

මෙම බිඳවැටීම සම්බන්ධයෙන් මරණ හෝ බරපතළ අහිතකර ප්‍රතිඵල මෙතෙක් වාර්තා වී නැහැ. සිදුවීම හේතුවෙන් පාරිභෝගිකයන්ට ඇති වූ අපහසුතාව සම්බන්ධයෙන් Optus සමාගම සමාව ඉල්ලා තිබෙනවා.

ජංගම දුරකථන ජාලයක් ක්‍රියා නොකරන අවස්ථාවක Triple Zero ඇමතුමක් වෙනත් පවතින ජාලයක් හරහා සම්බන්ධ විය හැකි බැවින් දුරකථනය නැවත ආරම්භ කර 000 අමතන ලෙස බලධාරීන් උපදෙස් ලබා දෙනවා.