ලෝක මට්ටමේ දැවැන්ත ව්‍යසනයක් හෝ වසංගතයක් ඇති වුවහොත්, පෘථිවියේ වැඩිම ආරක්ෂාවක් සහිත රටක් ලෙස ඔස්ට්‍රේලියාව සැලකිය හැකි බව නවතම පර්යේෂණයකින් අනාවරණය වී තිබෙනවා.

Global Challenges නම් සඟරාවේ පළ වූ නවතම පර්යේෂණයකට අනුව, ඔස්ට්‍රේලියාවේ භූගෝලීය හුදෙකලා වීම, ස්වයංපෝෂිතභාවය සහ දේශපාලන ස්ථාවරත්වය යන සාධක හේතුවෙන් බොහෝ අර්බුදවලට මුහුණ දීමේ වැඩි හැකියාවක් පවතිනවා.

න්‍යෂ්ටික යුද්ධයකින් පසු උදාවන අඳුරු කාලපරිච්ඡේද, උල්කාපාත පතිත වීම් හෝ තාක්ෂණික මට්ටමේ බිඳවැටීම් වැනි ගෝලීය ව්‍යසනකාරී අවස්ථාවලදී ඔස්ට්‍රේලියාව සහ නවසීලන්තය යන රටවල් ආරක්ෂිතම ස්ථාන අතර ඉදිරියෙන්ම සිටින බවයි පර්යේෂනයින් පෙන්වා දෙන්නේ.

ආහාර, බලශක්තිය, ප්‍රවාහනය සහ සන්නිවේදන අංශවලින් ස්වයංපෝෂිත වීමට මෙම දූපත් ජාතීන්ට ඇති හැකියාව මීට ප්‍රධාන හේතුවක්.

කෙසේ වෙතත්, වැඩි ජනගහනයක් ජීවත් වන ප්‍රධාන නගර මෙවැනි අවදානම් හමුවේ ඉතා ඉක්මනින් කඩා වැටිය හැකි බවට පර්යේෂකයින් අනතුරු අඟවනවා.

සැපයුම් දාම බිඳවැටීම සහ ජනගහන ඝනත්වය හේතුවෙන් නගරවලට වඩා කුඩා ප්‍රාදේශීය ප්‍රජාවන් මෙවැනි අර්බුද හමුවේ වඩාත් සාර්ථකව අනුවර්තනය වීමට ඉඩ ඇති බව ද ඔවුන් පෙන්වා දී තිබෙනවා.

කෙසේ වෙතත්, කිසිදු රටකට ගෝලීය ව්‍යසනයක බලපෑමෙන් සම්පූර්ණයෙන්ම ගැලවී සිටිය නොහැකි බැවින්, ආර්ථික කාර්යක්ෂමතාවට වඩා පද්ධතිවල ඔරොත්තු දීමේ හැකියාව (resilience) කෙරෙහි අවධානය යොමු කිරීම අත්‍යවශ්‍ය බවයි පර්යේෂකයින් අවධාරණය කරන්නේ.