කොවිඩ් වසංගතයෙන් පසු ලොව පුරා බොහෝ රටවල කතාබහට ලක් වූ ‘Work from Home’ සංකල්පය පිළිබඳ ඔස්ට්‍රේලියාවෙන් අපූරු පුවතක් වාර්තා වනවා.

වික්ටෝරියා ප්‍රාන්තයේ සේවකයන්ට සතියකට දින දෙකක් නිවසේ සිට වැඩ කිරීමට අයිතිය ලබාදෙන ආන්දෝලනාත්මක නීති මාලාව කම්කරු පක්ෂය පාර්ලිමේන්තුවේ ඉහළ මන්ත්‍රී මණ්ඩලයේදී පරාජය වීමත් සමඟ තාවකාලිකව අත්හිටුවා තිබෙනවා.

කෙසේ වෙතත්, නවතම මත විමසුමකින් හෙළි වී ඇත්තේ බහුතරයක් ඔස්ට්‍රේලියානුවන් මෙම නීතිවලට එතරම් කැමැත්තක් නොදක්වන බවයි.

නිවසේ සිට වැඩ කිරීමේ අයිතිය නීතිගත කිරීමට සහාය දක්වන්නේ ප්‍රතිශතයක් ලෙස සියයට 24 ක් පමණක් බවයි nine.com.au වෙබ් අඩවිය විසින් පුද්ගලයන් 1,092 දෙනෙකු සම්බන්ධ කරගනිමින් සිදු කළ මත විමසුමකින් අනාවරණය වී ඇත්තේ.

එම නීතිවලට සහය නොදක්වන 76%ක පිරිස ප්‍රකාශ කර ඇත්තේ, වැඩ කරන ආකාරය සහ කොන්දේසි පාලනය කිරීමේ අයිතිය ආයතන ප්‍රධානීන්ට පැවරිය යුතු බවයි.

ගොවීන් සහ ගුරුවරුන් වැනි නිවසේ සිට තම රාජකාරී කිරීමට නොහැකි වෘත්තිකයන් පෙන්වා දී ඇත්තේ, සියලු දෙනාටම එකම නීතියක් යෙදීම අසාධාරණ බවයි.

කෙසේ වෙතත්, සතියේ දින පහම නැවත කාර්යාලයට පැමිණෙන ලෙස නියෝග කළහොත් බොහෝ සේවකයන් ඊට එරෙහිව දැඩි අරගලයකට නොයන බව ද මෙම සමීක්ෂණයෙන් තහවුරු වී තිබෙනවා.

මේ අතර සේවකයන් කාර්යාලයට පැමිණීමට මැලිකමක් දක්වන්නේ එදිනෙදා ගත කිරීමට සිදුවන දිගු ගමනාගමනය සහ කාලය නිසා බවයි International Workplace Group (IWG)හි ජ්‍යෙෂ්ඨ උප සභාපති Lisia Rothපෙන්වා දෙන්නේ.

මෙවැනි තත්ත්වයන් හමුවේ සේවායෝජකයන් සහ සේවකයන් අතර විවෘත සාකච්ඡා පවත්වමින්, ව්‍යාපාරික අරමුණු සහ සේවක පුද්ගලික අවශ්‍යතා අතර සමතුලිතතාවක් ඇති කර ගැනීම වඩා වැදගත් වන බව විශේෂඥයන්ගේ අදහසයි.