ඔස්ට්‍රේලියාවේ Brisbane සිට ජපානයේ Tokyo බලා පියාසර කරමින් තිබූ Jetstar ගුවන් යානයක්, මගියෙකුට ඇති වූ හදිසි වෛද්‍ය තත්ත්වයක් හේතුවෙන් යළි Brisbane ගුවන් තොටුපළ වෙත නැවත පැමිණ තිබෙනවා.

JQ9 දරන මෙම ගුවන් යානය ඔස්ට්‍රේලියානු වේලාවෙන් අද (30) උදෑසන 10.50ට පමණ ගමන් ආරම්භ කර ඇති අතර, පැය එකහමාරකට පමණ පසු මගියෙකු සිහිසුන්ව ඇද වැටීමත් සමඟ කාර්ය මණ්ඩලය වෛද්‍ය සහාය ඉල්ලා තිබෙන බවටයි වාර්තා වන්නේ.

ඒ අනුව, ගුවන් යානය Brisbane වෙත යළි ගොඩබස්වා ඇති අතර, එහිදී ගිලන් රථ සේවකයන් ඇතුළු හදිසි සේවා නිලධාරීන් ගුවන් යානයට පැමිණ අදාළ මගියා රෝහල වෙත රැගෙන යාමට කටයුතු කර තිබෙනවා.

කෙසේ වෙතත්, යානය ගොඩබැස්වීමෙන් පසුව මගීන්ට පැයකට අධික කාලයක් යානය තුළ රැඳී සිටීමට සිදුව ඇති බවයි වාර්තා වන්නේ. මෙම සිදුවීම හේතුවෙන් තම ගමන් සැලසුම්වලට දැඩි බාධා එල්ල වූ බව මගීන්ගෙන් චෝදනා එල්ල වන අතර, ගමන පැය හයකින් පමණ ප්‍රමාද විය හැකි බවයි වාර්තා වන්නේ.

මේ අතර, Jetstar ගුවන් සමාගම මෙම සිදුවීම තහවුරු කර ඇති අතර මගීන්ගේ සහ කාර්ය මණ්ඩලයේ ආරක්ෂාව තම ප්‍රමුඛතාව බව එම සමාගම වැඩිදුරටත් සඳහන් කර තිබෙනවා.

අදාළ මගියාගේ වත්මන් සෞඛ්‍ය තත්ත්වය සහ හදිසි තත්ත්වයට හේතුව මෙතෙක් අනාවරණය වී නැහැ.