ඔස්ට්‍රේලියාවේ ජීවන වියදම ඉහළ යාමත් සමඟ ආහාර ද්‍රව්‍ය මිලදී ගැනීමේදී මුදල් ඉතිරි කරගැනීමට පාරිභෝගිකයන් නව ක්‍රම සොයමින් සිටින පසුබිමක සුපිරි වෙළෙඳසැල්වල භාණ්ඩ මිල සංසන්දනය කිරීමට භාවිත කරන යෙදවුමක් මඟින් වසරකට ඩොලර් 1,500ක් දක්වා ඉතිරි කරගත හැකි ක්‍රමයක් වාර්තා වෙනවා.

25 හැවිරිදි Alex Sullivan පවසන්නේ Zyft නම් නොමිලේ භාවිත කළ හැකි යෙදවුම මගින් සතියකට ඩොලර් 25ත් 30ත් අතර මුදලක් ඉතිරි කරගැනීමට තමන්ට හැකි වූ බවයි.

මෙම යෙදවුමේ ඇති Grocery Lists පහසුකම මඟින් Coles සහ Woolworths යන සුපිරි වෙළෙඳසැල් දෙකෙහිම භාණ්ඩ මිල එකවර සංසන්දනය කළ හැකි වන අතර Amazon වෙතින් මිලදී ගත හැකි ඇතැම් ගෘහස්ථ අවශ්‍යතා සහ ආහාර ගබඩා භාණ්ඩවල මිල ගණන්ද මෙහිදී සංසන්දනය කළ හැකි බවයි සදහන්.

Alex පවසන්නේ තම පවුලේ සතිපතා සිදුකරන ආහාර ද්‍රව්‍ය මිලදී ගැනීම් සඳහා ඩොලර් 200ක් පමණ වැය වන අතර, මෙම යෙදුම භාවිතයෙන් මාසයකට ඩොලර් 100ත් 120ත් අතර මුදලක් ඉතිරි කරගැනීමට හැකි වූ බවයි.

මේ අතර භාණ්ඩ මිල ගණන් නිරන්තරයෙන් වෙනස් වන බැවින් පාරිභෝගිකයන් තම වියදම් සහ මිල වෙනස්වීම් පිළිබඳව අවධානයෙන් සිටීම වැදගත් බවයි ආර්ථික විශේෂඥයන් පෙන්වා දෙන්නේ.
එමෙන්ම, භාණ්ඩවල මිල පමණක් නොව ඒවායේ ප්‍රමාණය අඩු කරමින් එකම මිලක් පවත්වාගෙන යන Shrinkflation තත්ත්වය පිළිබඳව ද පාරිභෝගිකයන් සැලකිලිමත් විය යුතු බව ද වාර්තා වෙනවා.