ලොව පුරා යුද ගැටුම්වලදී ප්‍රහාරක ඩ්‍රෝන යානා භාවිතය ඉහළ යාමත් සමඟ, සිය ගුවන් ආරක්ෂාව ශක්තිමත් කිරීම සඳහා ඊශ්‍රායලයේ Iron Dome පද්ධතියට සම්බන්ධ Interceptor මිසයිල මිලදී ගැනීමට ඔස්ට්‍රේලියාව සලකා බලමින් සිටින බවට තොරතුරු වාර්තා වෙනවා.

ඔස්ට්‍රේලියානු ආරක්ෂක නිලධාරීන් පාර්ලිමේන්තු කමිටුවක් හමුවේ සඳහන් කර ඇත්තේ, 2030 වසරේ මුල් භාගය වන විට භූමිය මත පදනම් වූ මිසයිල ආරක්ෂක පද්ධතියක් ස්ථාපිත කිරීම රජයේ අරමුණ බවයි.

ඒ සඳහා ඇමරිකාවේ Patriot මිසයිල ආරක්ෂක පද්ධතිය මෙන්ම, ඊශ්‍රායලයේ Rafael Advanced Defense Systems සමාගම විසින් Iron Dome පද්ධතිය වෙනුවෙන් නිපදවන Interceptor මිසයිල ලබා ගැනීමේ හැකියාව පිළිබඳව ද සාකච්ඡා පැවැත්වෙනවා.

ඇමරිකානු මැරීන් බලකාය විසින් භාවිත කරන නව පද්ධතියකට ද මෙම ඊශ්‍රායල තාක්ෂණය යොදාගෙන ඇති අතර, එය ඇමරිකානු Raytheon සමාගම සමඟ එක්ව නිෂ්පාදනය කරන බවයි සඳහන් වෙන්නේ.

ඔස්ට්‍රේලියානු ආරක්ෂක බලකාය විසින් 2027 වසරේ පැවැත්වීමට නියමිත Talisman Sabre යුද අභ්‍යාසයට අදාළ තරගකාරී තේරීම් ක්‍රියාවලියකින් පසුව, ලබන වසරේදී රජයට නිල නිර්දේශ ඉදිරිපත් කිරීමට නියමිතයි.

මේ අතර, ඔස්ට්‍රේලියානු ආරක්ෂක කඳවුරු ආශ්‍රිතව වාර්තා වන ඩ්‍රෝන යානා ඇතුළුවීම් ඉහළ යාමද ආරක්ෂක අංශවල අවධානයට ලක්ව තිබෙනවා. 2022 වසරේදී එවැනි සිදුවීම් 19ක් වාර්තා වී ඇති අතර, පසුගිය වසරේදී එය 204ක් දක්වා ඉහළ ගොස් ඇති බවයි වාර්තා වන්නේ.

කෙසේ වෙතත්, ඔස්ට්‍රේලියාව ඊශ්‍රායලයට ආයුධ සපයන්නේ නැති අතර, ඊශ්‍රායල ආරක්ෂක නිෂ්පාදන මිලදී ගැනීම සම්බන්ධයෙන් ඔස්ට්‍රේලියාව තුළ දේශපාලන අවධානයක්ද පවතිනවා.