ඔස්ට්‍රේලියාවේ Melbourne නගරයේ ගිනිකොනදිග ප්‍රදේශයේ (South-East) පිහිටි ට්‍රක් රථ නැවැත්වීමේ ස්ථානයක් නීති විරෝධී ලෙස කසළ බැහැර කිරීම වැළැක්වීමේ අරමුණින් වසා දමා වැටක් ඉදිකර තිබෙනවා.

Clayton South ප්‍රදේශයේ Westall Road ආසන්නයේ පිහිටි මෙම ස්ථානයේ දිගින් දිගටම විශාල වශයෙන් කසළ බැහැර කිරීම් හේතුවෙන් මෙම පියවර ගෙන ඇති බවයි වාර්තා වෙන්නේ. කෙසේ වෙතත්, වැට ඉදිකිරීම අවසන් වී දින කිහිපයක් ගතවීමටත් පෙර එම වැටෙන් පිටත යළිත් කසළ බැහැර කර තිබෙනවා.

මෙම තීරණය සම්බන්ධයෙන් වික්ටෝරියා ප්‍රාන්තයේ ප්‍රවාහන ක්ෂේත්‍රය නියෝජනය කරන Victorian Transport Association ආයතනය විරෝධය පළ කර ඇති අතර, එහි ප්‍රධාන විධායක Peter Anderson පවසන්නේ, මෙම ස්ථානය වසා දැමීම සම්බන්ධයෙන් ට්‍රක් රථ රියදුරන්ගෙන් අදහස් විමසා නොමැති බවත්, ඒ හේතුවෙන් රියදුරන්ට ආරක්ෂිතව රථ නවත්වා විවේක ගැනීමට තිබූ අවස්ථාවත් අහිමි වී ඇති බවයි.

කෙසේ වෙතත්, ට්‍රක් රථ රියදුරන්ට Westall Road හි ප්‍රතිවිරුද්ධ පස ඇති මාර්ග කොටසේ හෝ එම ස්ථානයේ සිට කිලෝමීටර් හතක් පමණ බටහිර දෙසින් පිහිටි South Road හි ට්‍රක් රථ නවත්වා තැබිමට භාවිතා කළ හැකි බවයි ප්‍රාන්ත රජය පවසන්නේ.

මේ අතර, වික්ටෝරියා ප්‍රාන්තයේ නීති විරෝධී කසළ බැහැර කිරීම් හඳුනාගෙන ඒ සම්බන්ධයෙන් නීතිමය පියවර ගැනීම සඳහා ප්‍රාන්ත රජය පසුගිය වසරේ ඔක්තෝබර් මාසයේදී විශේෂ කාර්ය සාධක බලකායක් ද පිහිටුවා තිබෙනවා. එම වැඩපිළිවෙළ යටතේ කසළ බැහැර කරන ස්ථාන හඳුනාගැනීම සහ ඒවා පිරිසිදු කිරීම සඳහා පළාත් පාලන ආයතන සමඟ එක්ව කටයුතු කරන බවයි පරිසර ආරක්ෂණ අධිකාරිය (EPA) සඳහන් කරන්නේ.