ඔස්ට්‍රේලියාවේ Oz Lotto ලොතරැයියේ විශාල ත්‍යාග දිනාගත් පුද්ගලයන් භාවිත කළ ටිකට්පත් පිළිබඳ තොරතුරු රැසක් අනාවරණය වී තිබෙනවා.

පසුගිය අප්‍රේල් මාසයේදී සිඩ්නි නගරයේ කාන්තාවක් ඩොලර් මිලියන 15ක ජයමල්ලක් දිනාගෙන ඇත්තේ සාමාන්‍ය අංක හත වෙනුවට අංක අටක් තෝරාගත හැකි System 8 ටිකට්පතක් භාවිත කරමින්.

එමෙන්ම පසුගිය පෙබරවාරි මාසයේදී Newcastle නගරයේ පුද්ගලයෙකු QuickPick System 9 ටිකට්පතක් මිලදී ගැනීමෙන් ඩොලර් මිලියන 40ක ජයමල්ලක් දිනාගෙන තිබුණා.

The Lott ආයතනයේ දත්ත අනුව 2026 ජූනි 30න් අවසන් වූ වසර තුළ Oz Lotto පළමු පෙළේ ජයග්‍රාහී ටිකට්පත් 20ක් වාර්තා වී ඇති අතර, ඉන් හතරක්ම ක්‍රීඩා වාර 18ක් ඇතුළත් ටිකට්පත් බව අනාවරණය වී තිබෙනවා.

එමෙන්ම පළමු පෙළේ ජයග්‍රාහී ටිකට්පත් 20න් 16ක්ම පරිගණකය මඟින් අහඹු ලෙස අංක තෝරාදෙන QuickPick ක්‍රමය භාවිත කර තිබීම ද විශේෂත්වයක්.

Oz Lotto ලොතරැයියේ එක් සාමාන්‍ය ක්‍රීඩා වාරයකින් ප්‍රධාන ජයමල්ල දිනාගැනීමේ සම්භාවිතාව මිලියන 62.9කට එකක් පමණ වන අතර, වැඩි ක්‍රීඩා වාර සංඛ්‍යාවක් මිලදී ගැනීමෙන් ජයග්‍රහණය සඳහා වැඩි අවස්ථා ලැබුණ ද එක් ක්‍රීඩා වාරයක ජයග්‍රාහී සම්භාවිතාව වෙනස් නොවන බව පැහැදිලි කර තිබෙනවා.

මේ අතර මීට පෙර Oz Lotto දිනුම් ඇදීම්වල වැඩි වාර ගණනක් වාර්තා වූ අංක අතර 21, 47 සහ 24 ඇතුළත් වන අතර, අඩුවෙන් වාර්තා වූ අංක ලෙස 15, 11 සහ 26 හඳුනාගෙන තිබෙනවා.

කෙසේ වෙතත්, මෙම අංක මීළඟ දිනුම් ඇදීමේදී ජයග්‍රහණය කිරීමට වැඩි ඉඩක් ඇති බවක් ඉන් අදහස් වන්නේ නැහැ.

පසුගිය මූල්‍ය වර්ෂය තුළ ඔස්ට්‍රේලියාව පුරා Oz Lotto පළමු පෙළේ ජයග්‍රාහී ටිකට්පත් 20ක් සඳහා ඩොලර් මිලියන 300ක ත්‍යාග මුදලක් හිමිව තිබෙනවා.

ඉන් වැඩිම ජයග්‍රාහී ටිකට්පත් සංඛ්‍යාව වන 11ක් නිව් සවුත් වේල්ස් ප්‍රාන්තයෙන් වාර්තා වී ඇති අතර, වික්ටෝරියා සහ බටහිර ඔස්ට්‍රේලියා ප්‍රාන්තවලින් ජයග්‍රාහී ටිකට්පත් තුන බැගින් වාර්තා වී තිබෙනවා.