ඔස්ට්‍රේලියාවේ නිවාස මිලදී ගැනීමේ වියදම් ඉහළ යාම හමුවේ, නිවසක් ඉදිකිරීමට කැමති පුද්ගලයන් ආකර්ෂණය කරගැනීම සඳහා Queensland ප්‍රාන්තයේ කුඩා නගරයක් විශේෂ වැඩපිළිවෙළක් ආරම්භ කර තිබෙනවා.

Brisbane නගරයේ සිට කිලෝමීටර් 1,000කට ආසන්න දුරින් පිහිටි Quilpie නගරය මෙම වැඩසටහන යටතේ නව නිවාස ඉඩම් 62ක් ලබාදීමට සැලසුම් කර තිබෙනවා.

එම ඉඩම්වල නිවාස ඉදිකරන සුදුසුකම් ලබන පුද්ගලයන්ට $20,000ක ප්‍රදානයක් ලබාදීමත් මෙහි විශේෂත්වයක්.

මෙම වැඩපිළිවෙළේ ප්‍රධාන අරමුණ වන්නේ 500කට අධික ජනගහනයක් සිටින නගරයේ ජනගහනය වැඩි කිරීම සහ ප්‍රදේශයේ නිවාස සැපයුම ඉහළ නැංවීමයි.

කෙසේ වෙතත්, මෙවැනි වැඩසටහනක් මීට පෙර 2021 වසරේදීත් ක්‍රියාත්මක කර තිබුණත්, වසර පහක් තුළ එම ඉඩම්වල ඉදිකර ඇත්තේ නිවාස දෙකක් පමණක් බව වාර්තා වනවා.

ප්‍රදේශයේ ඉදිකිරීම් ද්‍රව්‍ය ප්‍රවාහනය කිරීමේ වියදම් සහ ශ්‍රමිකයන් සඳහා වැයවන මුදල් ඉහළ මට්ටමක පැවතීම නිසා නිවසක් ඉදිකිරීම තවදුරටත් අභියෝගයක් වී තිබෙනවා.

ඒ අනුව, $20,000ක ප්‍රදානයක් පමණක් නොව රැකියා අවස්ථා, ප්‍රවාහන පහසුකම් සහ අත්‍යවශ්‍ය සේවා දියුණු කිරීමත් කුඩා නගරවල ජනගහනය වර්ධනය කිරීම සඳහා වැදගත් බව පෙන්වා දෙනවා.