ඔස්ට්‍රේලියාවට මත්ද්‍රව්‍ය ප්‍රවාහනය වැළැක්වීම සඳහා ඔස්ට්‍රේලියානු ෆෙඩරල් පොලිසිය (AFP) විසින් කොලොම්බියාවේ පිහිටුවීමට සැලසුම් කළ ජාත්‍යන්තර විමර්ශන කණ්ඩායම පිළිබඳ බරපතළ ගැටලු රැසක් අනාවරණය වී තිබෙනවා.

පසුගිය මැයි මාසයේදී ඔස්ට්‍රේලියානු ෆෙඩරල් පොලිස් කොමසාරිස් Krissy Barrett ප්‍රකාශ කළේ නවසීලන්ත පොලිසිය සමඟ එක්ව කොලොම්බියාවේ Bogotá අගනුවර ජාත්‍යන්තර මත්ද්‍රව්‍ය මර්දන විමර්ශන කණ්ඩායමක් පිහිටුවන බවයි.

කෙසේ වෙතත්, ඔස්ට්‍රේලියාවේ ABC මාධ්‍ය ආයතනය සහ කොලොම්බියාවේ El Tiempo පුවත්පත එක්ව සිදුකළ විමර්ශනයකදී අනාවරණය වී ඇත්තේ කොලොම්බියානු ජාතික පොලිසියේ ප්‍රධාන විමර්ශන අංශ දෙකකට මෙම වැඩසටහන සම්බන්ධයෙන් නිශ්චිත මෙහෙයුම් ගිවිසුම් පිළිබඳ තොරතුරු නොමැති බවයි.

එම පොලිස් අංශ සඳහන් කර ඇත්තේ අදාළ වැඩසටහන යටතේ ඔස්ට්‍රේලියානු පොලිසිය සමඟ මත්ද්‍රව්‍ය සම්බන්ධ බුද්ධි තොරතුරු හුවමාරු කර නොමැති අතර, ඒකාබද්ධ මත්ද්‍රව්‍ය වැටලීම් හෝ අත්අඩංගුවට ගැනීම් කිසිවක් සිදුකර නොමැති බවයි.

මේ අතර, මෙම ජාත්‍යන්තර විමර්ශන කණ්ඩායම මෙතෙක් මෙහෙයුම් ආරම්භ කර නොමැති නමුත් කොලොම්බියානු බලධාරීන් සමඟ සහයෝගිතා ගිවිසුම් ඇතිකරගෙන තිබෙන බවයි ඔස්ට්‍රේලියානු ෆෙඩරල් පොලිසිය තහවුරු කර ඇත්තේ.

මෙම වැඩසටහන සඳහා වෙන්කර ඇති මුදල් ප්‍රමාණය සහ මෙහෙයුම් සැලසුම් පිළිබඳ ලේඛන 60ක් හෙළිදරව් කිරීම ද ජාතික ආරක්ෂාව සහ ජාත්‍යන්තර සබඳතා සම්බන්ධ හේතු දක්වමින් ඔස්ට්‍රේලියානු ෆෙඩරල් පොලිසිය ප්‍රතික්ෂේප කර තිබෙනවා.

කෙසේ වෙතත්, මෙම වසරේ ජනවාරි මාසයේ සිට පැසිෆික් කලාපය හරහා ඔස්ට්‍රේලියාවට පැමිණීමට නියමිතව තිබූ කොකේන් ඇතුළු නීතිවිරෝධී මත්ද්‍රව්‍ය ටොන් 17ක් ජාත්‍යන්තර සහ ප්‍රාදේශීය පොලිස් මෙහෙයුම් මගින් අත්අඩංගුවට ගෙන ඇති බවයි කොමසාරිස් Krissy Barrett ප්‍රකාශ කර ඇත්තේ.

එහෙත් එම මත්ද්‍රව්‍ය වැටලීම් අලුතින් ප්‍රකාශයට පත්කළ ජාත්‍යන්තර විමර්ශන කණ්ඩායම විසින් සිදුකළ මෙහෙයුම් නොවන බව ද අනාවරණය වී තිබෙනවා.