වික්ටෝරියාවේ ස්වාධීන මන්ත්‍රී Helen Hainesට Wangaratta හිදී එල්ල වූ බවට සැක කෙරෙන ඉලක්කගත වාහන ප්‍රහාරයෙන් පසු, ඇගේ දෙවන පාදයත් ශල්‍යකර්මයකින් ඉවත් කර තිබෙනවා. ඇගේ සැමියා Phil Haines අද තහවුරු කර ඇත්තේ, ඇය මේ වනවිට ස්ථාවර තත්ත්වයේ සිටින බවයි.

65 හැවිරිදි Haines සඳුදා තම electorate office අසල මෝටර් රථයෙන් බඩු ඉවත් කරමින් සිටියදී වාහනයක ගැටී බරපතළ තුවාල ලබා තිබුණා. සාක්ෂිකරුවන් පවසන්නේ සැකකරු වාහනයෙන් ඇයට ගැටීමෙන් පසු නැවත වාහනය පසුපසට ගෙන ඇයට දෙවැනි වරටත් ගැටුණු බවයි.

මෙම ප්‍රහාරයෙන් Hainesගේ පාදවලට ඉතා බරපතළ තුවාල සිදුවූ අතර, පළමු පාදය අඟහරුවාදා ඉවත් කිරීමට වෛද්‍යවරුන්ට සිදුවුණා. අනෙක් පාදය රැකගැනීමට ශල්‍ය වෛද්‍යවරුන් උත්සාහ කළද, අවසානයේ එයත් ඉවත් කිරීමට සිදුව තිබෙනවා

ඇගේ සැමියා Phil Haines පවසා ඇත්තේ Helenගේ හදවත සහ මනස තවමත් ශක්තිමත්ව පවතින බවත්ය.

සිද්ධිය සම්බන්ධයෙන් 43 හැවිරිදි Brendan Nugentට අනතුරුදායක ලෙස රිය පදවා බරපතළ තුවාල සිදුකිරීම,හිතාමතා බරපතළ තුවාල සිදුකිරීම සහ රජයේ නිලධාරියෙකුට හානි සිදුකිරීම යන චෝදනා එල්ල කර තිබෙනවා. පොලීසිය පවසන්නේ විමර්ශනය තවදුරටත් ක්‍රියාත්මක වන අතර තවත් චෝදනා එල්ල විය හැකි බවයි.

මෙම සිද්ධියෙන් Wangaratta ප්‍රජාව දැඩි කම්පනයකට ලක්ව ඇති අතර, ඇගේ කාර්යාලය ඉදිරිපිට මල් සහ පණිවිඩ තබමින් ජනතාව සහය පළ කරමින් සිටිනවා. Australian Red Cross විසින් ප්‍රදේශවාසීන්ට මානසික සහාය ලබාදීම සඳහා කණ්ඩායම්ද යොදවා තිබෙනවා.

මෙම ප්‍රහාරයෙන් පසු ඔස්ට්‍රේලියානු දේශපාලනඥයන්ගේ ආරක්ෂාව, රජයේ නිලධාරීන් වෙත එල්ල වන තර්ජන සහ දේශපාලන ප්‍රචණ්ඩත්වය පිළිබඳව රටපුරා නැවත දැඩි සංවාදයක් ආරම්භ වී තිබෙනවා.