Sydney නගරයේ පිහිටි ජනප්‍රිය Centennial Park හි පොකුණකින් දැවැන්ත මාළුවෙකු අල්ලාගෙන රැගෙන යන කාන්තාවකගේ වීඩියෝවක් සමාජ මාධ්‍ය ඔස්සේ පැතිර යාමත් සමඟ ඒ පිළිබඳව මේ වන විට දැඩි කතාබහක් නිර්මාණය වී තිබෙනවා.

මෙම වීඩියෝවේ දැක්වෙන්නේ කාන්තාවක් තම උරහිස මත විශාල Carp මාළුවෙකු රැගෙන යන ආකාරයයි.

මෙම සිදුවීම සම්බන්ධයෙන් ඇතැම් සමාජ මාධ්‍ය පරිශීලකයන් කාන්තාව විවේචනය කර ඇති අතර, තවත් පිරිසක් පෙන්වා දෙන්නේ දේශීය ජල පද්ධතිවලට හානි කරන ආක්‍රමණශීලී මත්ස්‍ය විශේෂයක් ඉවත් කිරීමට ඇය කටයුතු කර ඇති බවයි.

කෙසේ වෙතත්, මෙම සිදුවීම සම්බන්ධයෙන් ප්‍රතිචාර දක්වමින් Greater Sydney Parklands ආයතනය සඳහන් කර ඇත්තේ Centennial Parklands තුළ මසුන් ඇල්ලීම තහනම් බවයි.

ජලයේ ගුණාත්මකභාවය, වනජීවීන්ගේ ආරක්ෂාව සහ උද්‍යානයට පැමිණෙන ජනතාවගේ ආරක්ෂාව තහවුරු කිරීම සඳහා මෙම තහනම ක්‍රියාත්මක වන බව එම ආයතනය පෙන්වා දී තිබෙනවා.

එමෙන්ම, Centennial Park හි පොකුණුවල සිටින Carp මත්ස්‍යයන් නැගෙනහිර ඔස්ට්‍රේලියාවේ බොහෝ මිරිදිය පද්ධතිවල දක්නට ලැබෙන ආක්‍රමණශීලී විශේෂයක් බව ද බලධාරීන් සඳහන් කරනවා.

මෙම මත්ස්‍යයන් ජලයේ ගුණාත්මකභාවය පහත හෙළීමටත්, දේශීය මත්ස්‍ය විශේෂවල වර්ධනයට බාධා කිරීමටත් හේතු විය හැකි බව Greater Sydney Parklands වෙබ් අඩවියේ සඳහන්.

මෙම ගැටලුව පාලනය කිරීම සඳහා මසුන් ඇල්ලීම, දැල් භාවිතය සහ විශේෂිත විද්‍යුත් ක්‍රම ඇතුළු විවිධ පාලන ක්‍රම අත්හදා බලා තිබෙනවා.

එම ක්‍රියාමාර්ග යටතේ Carp මත්ස්‍යයන් ටොන් ගණනක් ඉවත් කර තිබුණත්, එම මත්ස්‍ය ගහනය සම්පූර්ණයෙන්ම තුරන් කිරීමට මෙතෙක් හැකි වී නැහැ.

මේ අතර, New South Wales හි Department of Primary Industries and Regional Development ආයතනය ද පෙන්වා දෙන්නේ Carp මත්ස්‍යයන්ගේ ප්‍රජනන හැකියාව හේතුවෙන් සම්පූර්ණයෙන්ම තුරන් කිරීම අපහසු බවත්ය.

කෙසේ වෙතත්, Centennial Park තුළ මසුන් ඇල්ලීම තහනම් බැවින්, මෙම කාන්තාවගේ ක්‍රියාව සම්බන්ධයෙන් සමාජ මාධ්‍ය ඔස්සේ මතුව ඇති විවාදය තවදුරටත් සමාජයේ අවධානයට ලක්ව තිබෙනවා.