ඔස්ට්‍රේලියාවේ ඉහළ ජීවන වියදම, උද්ධමනය සහ නිවාස ණය පොලී අනුපාත හේතුවෙන් ජනතාව මුහුණ දෙන ආර්ථික පීඩනය 2028 වසර අවසානය දක්වාම ඉහළ මට්ටමක පැවතිය හැකි බව නව ආර්ථික විශ්ලේෂණයකින් අනාවරණය වී තිබෙනවා.

Committee for Economic Development of Australia හෙවත් CEDA ආයතනය නිකුත් කළ නවතම වාර්තාවට අනුව, ඔස්ට්‍රේලියානු ජනතාව මුහුණ දෙන ආර්ථික පීඩනය මනින Misery Index දර්ශකය කොවිඩ් වසංගතයෙන් පසු වාර්තා වූ ඉහළ මට්ටම්වලට නැවත ආසන්න වී තිබෙනවා.

උද්ධමනය, විරැකියා අනුපාතය සහ පොලී අනුපාතය යන ප්‍රධාන ආර්ථික සාධක තුන පදනම් කරගෙන ගණනය කරන මෙම දර්ශකයට අනුව, 2023 වසරෙන් පසු ආර්ථික පීඩනය අඩුවීම සම්බන්ධයෙන් ලැබුණු ප්‍රගතිය මේ වනවිට නැවත අහිමි වී ඇති බව සඳහන්.

විශේෂයෙන් 2026 වසර තුළ සංචිත බැංකුව අවස්ථා හතරකදී පොලී අනුපාත ඉහළ නැංවීමත් සමඟ නිවාස ණය ගෙවන පවුල්වල මූල්‍ය පීඩනය තවදුරටත් වැඩි වී තිබෙනවා.

මේ අතර ඔස්ට්‍රේලියානු සංඛ්‍යාලේඛන කාර්යාංශය නිකුත් කළ සැප්තැම්බර් මාසයේ රැකියා දත්ත අනුව, රැකියා නියුක්තිකයන් සංඛ්‍යාව 39,300කින් අඩු වී ඇති අතර විරැකියා අනුපාතය සියයට 4.7 දක්වා ඉහළ ගොස් තිබෙනවා.

රැකියා වෙළෙඳපොළේ මෙම දුර්වල වීම හේතුවෙන් වසර අවසානයට පෙර සංචිත බැංකුව තවත් පොලී අනුපාත වැඩි කිරීමක් සිදුකිරීමේ අවදානම අඩුවිය හැකි බවයි ආර්ථික විශ්ලේෂකයන් පෙන්වා දෙන්නේ.

CEDA ආයතනයේ ආර්ථික විද්‍යා ප්‍රධානී Liam Dillon පවසන්නේ ඉහළ භාණ්ඩ මිල සහ නිවාස ණය ගෙවීම් හේතුවෙන් ඔස්ට්‍රේලියානු පවුල් දැඩි මූල්‍ය පීඩනයකට මුහුණ දෙන අතර, රැකියා වෙළෙඳපොළේ ස්ථාවරත්වය මෙතෙක් එම පීඩනය පාලනය කිරීමට උපකාරී වූ බවයි.

ඒ අනුව උද්ධමනය, විරැකියාව සහ පොලී අනුපාතය දිගුකාලීනව පහත හෙළීමට නම් රටේ නිෂ්පාදන ඵලදායිතාව ඉහළ නැංවීම අත්‍යවශ්‍ය බව CEDA ආයතනය අවධාරණය කරනවා.