ඔස්ට්‍රේලියාවේ රජයේ සුබසාධන දීමනා මත ප්‍රධාන වශයෙන් යැපෙන පුද්ගලයන් මිලියන 1.9කට ආසන්න පිරිසක් දරිද්‍රතා රේඛාවට පහළින් ජීවත් වන බව නවතම පර්යේෂණ වාර්තාවකින් අනාවරණය වී තිබෙනවා.

Australian Council of Social Service (ACOSS) සහ University of New South Wales (UNSW) එක්ව නිකුත් කළ මෙම වාර්තාවට අනුව, JobSeeker දීමනාව මත ප්‍රධාන වශයෙන් යැපෙන පවුල්වල පුද්ගලයන්ගෙන් සියයට 76ක් දරිද්‍රතාවයෙන් පීඩා විඳිනවා.

එමෙන්ම Youth Allowance දීමනාව මත යැපෙන පිරිසෙන් සියයට 73ක් සහ Parenting Payment මත යැපෙන පිරිසෙන් සියයට 71ක් දරිද්‍රතා රේඛාවට පහළින් ජීවත් වන බවද වාර්තාව පෙන්වා දෙනවා.

ඔස්ට්‍රේලියාවේ වයස අවුරුදු 15ට අඩු දරුවන් 757,000ක් පමණ දරිද්‍රතාවයෙන් පීඩා විඳින අතර, තනි මාපිය පවුල්වල දරුවන් දරිද්‍රතාවයට පත්වීමේ අවදානම දෙමාපියන් දෙදෙනාම සිටින පවුල්වල දරුවන්ට සාපේක්ෂව තුන් ගුණයකට ආසන්න බවද අනාවරණය වී තිබෙනවා.

පර්යේෂණයේදී තනි පුද්ගලයෙකු සඳහා සතියකට ඩොලර් 584ක් සහ දරුවන් දෙදෙනෙකු සිටින යුවළක් සඳහා සතියකට ඩොලර් 1,226ක් දරිද්‍රතා රේඛාව ගණනය කිරීමේ ආදායම් සීමාව ලෙස යොදාගෙන තිබෙනවා.

JobSeeker දීමනාව මත ප්‍රධාන වශයෙන් යැපෙන පවුල්වල ආදායම සාමාන්‍යයෙන් දරිද්‍රතා රේඛාවට වඩා සතියකට ඩොලර් 331කින් අඩු බවද පර්යේෂකයන් පෙන්වා දෙනවා.

ACOSS ප්‍රධාන විධායක නිලධාරිනී Cassandra Goldie පවසන්නේ ලොව ධනවත්ම රටවල් අතර සිටින ඔස්ට්‍රේලියාවේ මෙතරම් විශාල පිරිසක් දරිද්‍රතාවයෙන් පීඩා විඳීම බරපතළ ගැටලුවක් බවයි.

ඒ අනුව JobSeeker ඇතුළු රජයේ ආදායම් ආධාර දීමනා Age Pension මට්ටමට ඉහළ නැංවීම සහ අඩු ආදායම්ලාභීන් සඳහා සමාජ නිවාස පහසුකම් වැඩි කිරීම ඇතුළු ක්‍රියාමාර්ග වහාම ගත යුතු බව පර්යේෂකයන් රජයට නිර්දේශ කර තිබෙනවා.