ඔස්ට්‍රේලියානු අගමැති ඇන්තනි ඇල්බනීසිගේ රජය මුහුණ දෙන ආර්ථික සහ දේශපාලන අභියෝග හමුවේ පාලක කම්කරු පක්ෂයේ මන්ත්‍රීවරුන් අතර නොසතුට වර්ධනය වෙමින් පවතින බව දේශපාලන විශ්ලේෂණයකින් අනාවරණය වනවා.

මෙතෙක් අගමැතිවරයාගේ නායකත්වය පිළිබඳ දැඩි විශ්වාසයක් තබාගෙන කටයුතු කළ මන්ත්‍රීවරුන්ගෙන් ඇතැමෙකු රජයේ තීරණ සහ ක්‍රියාමාර්ග සම්බන්ධයෙන් ප්‍රශ්න කිරීමට පටන්ගෙන ඇති බව එහි සඳහන්.

විශේෂයෙන් ඉහළ ජීවන වියදම, උද්ධමනය, පොලී අනුපාත ඉහළ යාම සහ නිවාස වෙළෙඳපොළේ පවතින ගැටලු සම්බන්ධයෙන් රජය ගෙන ඇති ක්‍රියාමාර්ග පිළිබඳව ඔවුන්ගේ අවධානය යොමුව තිබෙනවා.

ආර්ථික අභියෝග හමුවේ රජයේ වියදම් සීමා කිරීමට මුදල් අමාත්‍ය ජිම් චාමර්ස් ගෙන ඇති ප්‍රතිපත්ති පිළිබඳවද පක්ෂය තුළ විවේචන මතුව ඇති බව වාර්තා වනවා.

බදු ප්‍රතිපත්ති, ක්‍රෙඩිට් කාඩ් ගෙවීම් සහ වෙනත් ආර්ථික තීරණ සම්බන්ධයෙන් රජය නිසි සැලසුමකින් කටයුතු නොකරන බවට ද ඇතැම් මන්ත්‍රීවරුන්ගේ මත පළ වී තිබෙනවා.

කෙසේ වෙතත්, පක්ෂයේ මන්ත්‍රී කණ්ඩායම අමතමින් අගමැති ඇල්බනීසි ප්‍රකාශ කර ඇත්තේ මීළඟ මැතිවරණය ආසන්න වනවිට කම්කරු පක්ෂයේ දේශපාලන තත්ත්වය යළි ශක්තිමත් වනු ඇති බවයි.

මේ අතර විපක්ෂ සන්ධානය තුළ පවතින ගැටලු හේතුවෙන් කම්කරු පක්ෂයට දේශපාලනිකව යළි ශක්තිමත් වීමට තවදුරටත් අවස්ථාව පවතින බවද විශ්ලේෂකයන් පෙන්වා දෙනවා.

කෙසේ නමුත් රජය අතින් සිදුවන බව කියන වළක්වාගත හැකි වැරදි සම්බන්ධයෙන් තවදුරටත් නිහඬව සිටීමට ඇතැම් කම්කරු පක්ෂ මන්ත්‍රීවරුන් සූදානම් නොමැති බව මෙම විශ්ලේෂණයෙන් අනාවරණය වනවා.