ඔස්ට්‍රේලියානුවන් තම ඇඳුම් අල්මාරිවල ගොඩගසාගෙන සිටින නමුත් කිසිදා භාවිත නොකරන ඇඳුම්වල ඇස්තමේන්තුගත වටිනාකම ඔස්ට්‍රේලියානු ඩොලර් බිලියන 15ක් පමණ වන බව නවතම පර්යේෂණයකින් අනාවරණය වී තිබෙනවා.

මෙම තත්ත්වය සැලකිල්ලට ගනිමින්, භාවිත නොකරන නමුත් තවදුරටත් හොඳ තත්ත්වයේ පවතින ඇඳුම් පරිත්‍යාග කරන ලෙස ඔස්ට්‍රේලියානු රතු කුරුස සංවිධානය ජනතාවගෙන් ඉල්ලීමක් කර ඇති බව වාර්තා වනවා.

Uber සමාගම විසින් සිදුකරන ලද පර්යේෂණයකට අනුව, ඔස්ට්‍රේලියානුවන්ගෙන් 87%ක් තමන් කිසිදා භාවිත නොකරන ඇඳුම් තවදුරටත් ළඟ තබාගෙන සිටින බවයි පැවසෙන්නේ.

එක් පුද්ගලයෙකු සතුව භාවිත නොකරන ඇඳුම්වල සාමාන්‍ය ඇස්තමේන්තුගත වටිනාකම ඔස්ට්‍රේලියානු ඩොලර් 719ක් පමණ වන බව ද එම පර්යේෂණයෙන් හෙළි වී තිබෙනවා.

මෙම තත්ත්වයට විසඳුමක් ලෙස ඔස්ට්‍රේලියානු රතු කුරුස සංවිධානය සහ Uber සමාගම එක්ව වාර්ෂික ඇඳුම් පරිත්‍යාග වැඩසටහන ක්‍රියාත්මක කරනවා.

ඒ අනුව, 2026 ඔක්තෝබර් 17 වැනි සෙනසුරාදා පෙරවරු 10 සිට පස්වරු 4 දක්වා සිඩ්නි, මෙල්බර්න්, බ්‍රිස්බේන්, ඇඩිලේඩ්, පර්ත් සහ කැන්බරා යන නගරවලදී මෙම වැඩසටහන ක්‍රියාත්මක කිරීමට සැලසුම් කර තිබෙන බවයි වාර්තා වෙන්නේ.

අදාළ නගරවල සුදුසුකම් ලබන පරිත්‍යාගශීලීන්ට Uber හෝ Uber Eats යෙදුම හරහා නොමිලේ කුරියර් සේවාවක් වෙන්කරගෙන, තම නිවසේ සිටම ඇඳුම් පරිත්‍යාග කිරීමට අවස්ථාව සැලසෙනවා.

පිරිසිදු, හොඳ තත්ත්වයේ පවතින ඇඳුම්, සපත්තු සහ උපාංග මෙලෙස පරිත්‍යාග කළ හැකි අතර ඒවා රතු කුරුස සංවිධානයේ වෙළෙඳසැල් හරහා අලෙවි කිරීමෙන් ලැබෙන ආදායම, අසරණ සහ සහාය අවශ්‍ය ජනතාව වෙනුවෙන් ක්‍රියාත්මක කරන මානුෂීය සේවාවන් සඳහා යොදා ගැනෙන බවයි පැවසෙන්නේ.

පසුගිය වසරේ ද පැවති මෙම වැඩසටහන හරහා ඇඳුම් කිලෝග්‍රෑම් 125,000කට අධික ප්‍රමාණයක් එකතු කරගෙන තිබූ බව ද වාර්තා වනවා.

රතු කුරුස සංවිධානය පෙන්වා දෙන්නේ, හොඳ තත්ත්වයේ භාවිත කළ ඇඳුම් නැවත භාවිතයට ගැනීමෙන් අවශ්‍යතා ඇති ජනතාවට සහාය වීමට මෙන්ම, රෙදිපිළි අපද්‍රව්‍ය ලෙස බැහැර කිරීම අවම කිරීමට ද හැකි වන බවයි.