ඔස්ට්‍රේලියාවේ ප්‍රධාන සුපිරි වෙළෙඳසැල් ජාලයන්ට අභියෝග කරමින් මෙල්බන්හි ප්‍රකෝටිපති ව්‍යාපාරික Adrian Portelli සිය පළමු LMCT+ සුපිරි වෙළෙඳසැල විවෘත කර තිබෙනවා.

මෙල්බන්හි Deer Park ප්‍රදේශයේ පිහිටි මෙම සුපිරි වෙළෙඳසැල විවෘත කළ අවස්ථාවේ විශාල පාරිභෝගික පිරිසක් පැමිණ සිටි අතර, භාණ්ඩ රැගෙන යන ට්‍රොලි පවා ප්‍රමාණවත් නොවූ බව වාර්තා වනවා.

මෙහිදී ලූනු කිලෝවක් ඩොලර් 1.50කට සහ කොත්තමල්ලි මිටියක් ඩොලර් 1කට වැනි අඩු මිල ගණන් යටතේ අලෙවි කර ඇති අතර, තක්කාලි ඇතුළු ඇතැම් එළවළු වර්ග අනෙකුත් සුපිරි වෙළෙඳසැල්වල මිලට වඩා අඩකටත් අඩුවෙන් අලෙවි කර තිබෙනවා.

කෙසේ වෙතත්, සියලුම භාණ්ඩ අනෙකුත් වෙළෙඳසැල්වලට වඩා ලාභදායී නොවන අතර, ඇතැම් මස් වර්ගවල මිල ඉහළ මට්ටමක පවතින බව ද අනාවරණය වී තිබෙනවා.

මෙම විශේෂ මිල සහන ලබාගැනීම සඳහා පාරිභෝගිකයන් වසරකට ඩොලර් 99ක පමණ සාමාජික ගාස්තුවක් ගෙවිය යුතු අතර, එම සාමාජිකත්වය හරහා LMCT+ ඉන්ධන පිරවුම්හල්වලින් ද සහන මිලට ඉන්ධන ලබාගැනීමට අවස්ථාව හිමිවනවා.

Adrian Portelli පවසන්නේ තමන්ගේ ඉන්ධන පිරවුම්හල් බොහොමයක් දැනට ලාභ නොලබන බවත්, නව සුපිරි වෙළෙඳසැල් ව්‍යාපාරයෙන්ද ආරම්භයේදී ලාභයක් අපේක්ෂා නොකරන බවයි.

ඔහුගේ ප්‍රධාන අරමුණ වැඩි පිරිසක් LMCT+ සාමාජිකත්වයට එක්කර ගැනීම වන අතර, ඉදිරියේදී ඔස්ට්‍රේලියාවේ සියලුම ප්‍රාන්තවල ඉන්ධන පිරවුම්හල් සහ සුපිරි වෙළෙඳසැල් ආරම්භ කිරීමට සැලසුම් කර තිබෙනවා.