ඔස්ට්‍රේලියාවේ වීසා කාලය ඉක්මවා රැඳී සිටින පුද්ගලයන් සම්බන්ධයෙන් දැඩි පියවර ගැනීමට රජය සහ විපක්ෂය ඉදිරිපත් කර ඇති යෝජනා හමුවේ, ගෘහස්ථ හිංසනයට ලක්වන සංක්‍රමණික කාන්තාවන්ගේ ආරක්ෂාව පිළිබඳව විශේෂඥයන් අනතුරු අඟවා තිබෙනවා.

අද මාධ්‍ය වාර්තා කළේ, ඇතැම් හිංසකයන් තම සහකාරියන්ගේ වීසා තත්ත්වය භාවිත කරමින් ඔවුන්ට තර්ජනය කරන බවයි.

වීසා අවලංගු කරන බවට පැවසීම, ආගමන බලධාරීන්ට පැමිණිලි කර රටින් පිටුවහල් කරවන බවට තර්ජනය කිරීම සහ වීසා අයදුම්පත් පිළිබඳ තොරතුරු සඟවා තැබීම ඒ අතර වනවා.

සමහර කාන්තාවන් තම වීසා අයදුම්පත ප්‍රතික්ෂේප වී ඇති බව හෝ තමන් නීත්‍යනුකූල වීසා තත්ත්වයක නොසිටින බව දැනගන්නේ බොහෝ කලකට පසුව බවත් වාර්තාවේ සඳහන්.

සංක්‍රමණ නීති දැඩි කිරීමේදී මෙවැනි හිංසනයන්ට ගොදුරු වූ පුද්ගලයන්ට අසාධාරණයක් සිදුවිය හැකි බව විශේෂඥයන් පෙන්වා දෙනවා.

මේ අතර, ඔස්ට්‍රේලියානු ස්වදේශ කටයුතු දෙපාර්තමේන්තුව සඳහන් කර ඇත්තේ ගෘහස්ථ හා පවුල් හිංසනයට මුහුණ දෙන වීසා හිමියන්ට සහාය ලබාදීමට තමන් කැපවී සිටින බවයි.

හිංසනයට ලක්වන පුද්ගලයන්ට තම ආරක්ෂාව වෙනුවෙන් උපකාර ලබාගත හැකි මාර්ග තිබුණත්, එම ආරක්ෂණ ක්‍රමවේද සියලුම වීසා වර්ග සඳහා එකසේ අදාළ නොවන බවද වාර්තාව පෙන්වා දෙනවා.

මෙම තත්ත්වය හමුවේ, හිංසනයෙන් පලා යන සංක්‍රමණිකයන්ගේ ආරක්ෂාව තහවුරු කරමින් සංක්‍රමණ නීති ක්‍රියාත්මක කළ යුතු බවට විශේෂඥයන් ඉල්ලා සිටිනවා.