ඔස්ට්‍රේලියාවේ ජීවන වියදම ඉහළ යාම සම්බන්ධයෙන් ෆෙඩරල් කම්කරු රජයට ජනතා චෝදනා එල්ල වෙද්දී, One Nation පක්ෂයේ ජනප්‍රියත්වය පහළ ගොස් ඇති බව නවතම Resolve Political Monitor සමීක්ෂණයකින් හෙළි වී තිබෙනවා.

මෙම සමීක්ෂණයට අනුව One Nation පක්ෂයේ ජනතා සහාය ප්‍රතිශත ඒකක 2කින් අඩු වී 25%ක් දක්වා පහළ ගොස් තිබීම විශේෂත්වයක්.

සමීක්ෂණයට සහභාගී වූ ඔස්ට්‍රේලියානුවන්ගෙන් 46%ක් ජීවන වියදම් පීඩනයට ප්‍රධාන වශයෙන් වගකිව යුත්තේ ෆෙඩරල් කම්කරු රජය බවට චෝදනා කර තිබෙනවා.

එම ප්‍රතිශතය පසුගිය මාර්තු මාසයට සාපේක්ෂව ප්‍රතිශත ඒකක 6ක ඉහළ යාමක් වන අතර, ජීවන වියදම සම්බන්ධයෙන් රජයට එල්ල වන පීඩනය ද වැඩි වෙමින් පවතින බව එමගින් පෙනී යනවා.

මේ අතර, ජීවන වියදම ඉහළ යාමට ගෝලීය තත්ත්වයන් ප්‍රධාන වශයෙන් වගකිව යුතු බව පවසා ඇත්තේ සමීක්ෂණයට සහභාගී වූවන්ගෙන් 26%ක් පමණයි.

කෙසේ වෙතත්, කම්කරු පක්ෂයේ ජනතා සහාය 29%ක් දක්වා ඉහළ ගොස් ඇති අතර, විපක්ෂ සන්ධානයේ සහාය 23%ක් දක්වා පහත වැටී තිබෙනවා.

ඔස්ට්‍රේලියානුවන් 2,250 දෙනෙකු සහභාගී වූ මෙම සමීක්ෂණ ප්‍රතිඵල අනුව, ජීවන වියදම ඉදිරි කාලයේදීත් රටේ දේශපාලන පක්ෂවල ජනප්‍රියත්වයට බලපාන ප්‍රධාන කරුණක් වනු ඇතැයි අපේක්ෂා කෙරෙනවා.