ඔස්ට්‍රේලියානු අගමැති Anthony Albanese මෙල්බන්හි ජනප්‍රිය සමාජ මාධ්‍ය විකට ශිල්පීන් දෙදෙනෙකු සමඟ රංගනයෙන් දායක වූ හාස්‍යජනක කෙටි වීඩියෝවක් මේ වනවිට සමාජ මාධ්‍ය ඔස්සේ දැඩි අවධානයට ලක්ව තිබෙනවා.

මෙල්බන්හි ජනප්‍රිය Swag on the Beat කණ්ඩායමේ Jack Say සහ Isaac Gibbons සමඟ අගමැතිවරයා මෙම වීඩියෝවට එක්ව ඇති අතර, එය ඔක්තෝබර් 9 වැනිදා සමාජ මාධ්‍ය වෙත නිකුත් කර තිබෙනවා.

වීඩියෝවේ දැක්වෙන්නේ තරුණයෙකු තම පෙම්වතියගේ පියා පළමු වරට හමුවීමට පැමිණෙන අවස්ථාවක් වන අතර, නිවසේ දොර විවෘත කරන පුද්ගලයා ඔස්ට්‍රේලියානු අගමැතිවරයා බව දැක ඔහු පුදුමයට පත්වන ආකාරයයි.

එහිදී තම දියණියට දැඩි ආරක්ෂාවක් ලබාදෙන පියෙකුගේ චරිතයට පණපොවන Albanese, ඇගේ සිත රිදවුවහොත් තරුණයාගේ HECS විශ්වවිද්‍යාල අධ්‍යාපන ණය නැවත ක්‍රියාත්මක කළ හැකි බවට විහිළුවෙන් අනතුරු අඟවනවා.

අගමැතිවරයාගේ මෙම අනපේක්ෂිත රංගනයට සමාජ මාධ්‍ය පරිශීලකයන් විවිධ ප්‍රතිචාර දක්වා ඇති අතර, ඇතැමුන් එය හාස්‍යජනක නිර්මාණයක් ලෙස අගය කර තිබෙනවා.

කෙසේ වෙතත්, අගමැතිවරයා විකට වීඩියෝවකට සහභාගි වීම සම්බන්ධයෙන් ඇතැම් පිරිස් විවේචන ද එල්ල කර ඇති බව  මාධ්‍ය වාර්තා කරනවා.

තරුණ පරපුර සමඟ සමාජ මාධ්‍ය ඔස්සේ සම්බන්ධ වීමට දේශපාලන නායකයන් වැඩි අවධානයක් යොමු කරන පසුබිමක, අගමැතිවරයාගේ මෙම රංගනය ඔස්ට්‍රේලියානු දේශපාලන ක්ෂේත්‍රයේ ද කතාබහට ලක්ව තිබෙනවා.