ඔස්ට්‍රේලියාවේ ජීවන වියදම් අර්බුදය මධ්‍යයේ, රජය සතු supermarket ජාලයක් ආරම්භ කර ජනතාවට අඩු මිලට අත්‍යවශ්‍ය ආහාර ද්‍රව්‍ය ලබාදිය යුතු බව Greens පාර්ශවයට සම්බන්ධ Green Institute ආයතනය යෝජනා කර තිබෙනවා.

යෝජනාව අනුව Coles සහ Woolworths සතු වෙළඳසැල් 200ක් මිලදීගෙන, තවත් වෙළඳසැල් 400කට වැඩි ප්‍රමාණයක් අලුතින් විවෘත කර රජය සතු supermarket ජාලයක් නිර්මාණය කිරීමට අදහස් කර තිබෙනවා.

මෙම වෙළඳසැල් හරහා සාමාන්‍ය grocery මිල සියයට 20කට වැඩි ප්‍රමාණයකින් අඩු කළ හැකි බවත්, බිත්තර, කිරි, පලතුරු, එළවළු, මස් සහ චීස් වැනි භාණ්ඩ වත්මන් මිලෙන් තුනෙන් දෙකක් පමණ වන මිලකට ලබාදීම අරමුණ බවත් වාර්තාවේ සඳහන්.

සාමාන්‍ය හතර දෙනෙකුගෙන් යුත් පවුලකට සතියකට ඩොලර් 60ක් පමණ, වසරකට ඩොලර් 3,134ක් පමණ ඉතිරි කරගත හැකි බව Green Institute ගණනය කර තිබෙනවා.

කෙසේවෙතත් මෙම ජාලය ආරම්භ කිරීමට වසර පහකදී ඩොලර් බිලියන 25.1ක් පමණ වැය වනු ඇති බවද යෝජනාවේ සඳහන් අතර, එය ඉතා විශාල ආරම්භක වියදමක්.

Greens නායක ඩේවිඩ් ෂූබ්‍රිජ් පවසන්නේ මෙම අදහස සාකච්ඡා කිරීමට වටිනා යෝජනාවක් බවයි. එහෙත් මෙය දැනට රජය අනුමත කළ හෝ ක්‍රියාත්මක කිරීමට තීරණය කළ වැඩසටහනක් නොවෙයි.

Green Institute විසින් පත් කළ YouGov සමීක්ෂණයකදී රජය සතු supermarket යෝජනාවට ප්‍රතිචාර දැක්වූවන්ගෙන් සියයට 80කට වැඩි පිරිසක් යම් මට්ටමක සහය පළ කර තිබුණත්, එම සමීක්ෂණයේදී වැඩසටහනේ මුළු වියදම ඔවුන්ට දැනුම් දී නොතිබූ බවයි වාර්තා වන්නේ.