Geoscience Australia අනුව භූකම්පනය අද අලුයම 2ට පසු Leongatha නගරයට කිලෝමීටර් 20කටත් අඩු දුරකින් උතුරු-නැගෙනහිර දෙසින් ඇති ප්‍රදේශයක සිදුව ඇති අතර, එහි ගැඹුර කිලෝමීටර් 10ක් පමණයි.

මෙම භූකම්පනය මෙල්බන් නගරයට දකුණු-නැගෙනහිරින් කිලෝමීටර් 135ක් පමණ දුරින් සිදුව ඇති අතර, වික්ටෝරියා ප්‍රාන්තයේ ප්‍රදේශ රැසක ජනතාවට කම්පනය දැනී තිබෙනවා.

Geoscience Australia වෙත භූකම්පනය දැනුණු බවට වාර්තා 20,000කට ආසන්න සංඛ්‍යාවක් ලැබී තිබීමෙන්, කම්පනය ඉතා පුළුල් ප්‍රදේශයකට දැනී ඇති බව පැහැදිලි වෙනවා.

Geoscience Australia හි භූ භෞතික විද්‍යාඥ Hadi Ghasemi පවසන්නේ, මෙය එම ප්‍රදේශයේ පසුගිය දශක දෙක තුළ වාර්තා වූ ප්‍රබල භූකම්පන අතරින් එකක් බවයි.

භූකම්පනයෙන් පසු අලුයම 3ට පෙර එම ප්‍රදේශයේම රික්ටර් මාපක 3.1ක පසුකම්පනයක්ද වාර්තා වී තිබෙනවා.

අද දිනය තුළ තවත් පසුකම්පන ඇතිවීමේ හැකියාව තිබුණත්, ප්‍රධාන භූකම්පනයෙන් පසුව කාලය ගතවෙත්ම එවැනි පසුකම්පන ඇතිවීමේ අවදානම අඩුවන බව විශේෂඥයන් පෙන්වා දෙනවා.

West Gippsland ප්‍රදේශයේ පදිංචිකරුවන් කිහිපදෙනෙකු ABC වෙත පවසා ඇත්තේ, නිවාස සහ ඇඳන් තදින් කම්පනය වූ බවත්, භූකම්පනය තත්පර 5ත් 10ත් අතර කාලයක් දැනුණු බවත්ය.

වික්ටෝරියා State Emergency Service පවසන්නේ මේ වනවිට ප්‍රජාවට ක්ෂණික තර්ජනයක් නොමැති අතර, තුවාල හෝ සැලකිය යුතු දේපළ හානි පිළිබඳ වාර්තා ලැබී නොමැති බවයි.

කෙසේවෙතත් භූකම්පනය දැනුණු ප්‍රදේශවල ජනතාව අවට අනතුරුදායක තත්ත්ව තිබේදැයි පරීක්ෂා කරමින්, තවත් පසුකම්පන ඇතිවිය හැකි බැවින් අවධානයෙන් සිටින ලෙස SES උපදෙස් දී තිබෙනවා.

මෙය වික්ටෝරියා ප්‍රාන්තයේ සතියක් ඇතුළත වාර්තා වූ දෙවැනි සැලකිය යුතු භූකම්පනය වන අතර, පසුගිය සතියේ High Country ප්‍රදේශයේ රික්ටර් මාපක 3.9ක භූකම්පනයක්ද වාර්තා වී තිබුණා.