ශ්‍රී ලංකාවේ වෛද්‍යවරුන් සහ අනෙකුත් වෘත්තීයවේදීන් සඳහා තවත් බදු සහන ලබාදිය යුතු බව රජයේ වෛද්‍ය නිලධාරීන්ගේ සංගමය ඉල්ලා තිබෙනවා.

සංගමය පවසන්නේ 2021/2022 සිට විශේෂඥ වෛද්‍යවරුන් සහ අනෙකුත් වෛද්‍ය නිලධාරීන් 2,500කට වැඩි පිරිසක් රට හැර ගොස් ඇති අතර, ඉහළ බදු බර ඊට ප්‍රධාන හේතුවක් බවයි.

2023 ජනවාරියේ හඳුන්වාදුන් පුද්ගලික ආදායම් බදු සංශෝධනවලින් පසුව යම් සහන ලබාදී තිබුණත්, උද්ධමනය, ජීවන වියදම් සහ ප්‍රවාහන වියදම් සලකා බලන විට ඒවා ප්‍රමාණවත් නොවන බව GMOA සඳහන් කරනවා.

ඇතැම් වෘත්තීයවේදීන්ගේ ආදායමෙන් සියයට 36කට ආසන්න ප්‍රමාණයක් සෘජු බදු ලෙස ගෙවීමට සිදුවන බව ද එම සංගමය පවසනවා.

වෛද්‍යවරුන්ගේ වැටුප් හා දීමනා වසර ගණනාවක් නිසි ලෙස සංශෝධනය නොවීමත්, ඇතැම් අතිකාල සහ නිවාඩු දින ගෙවීම් අඩුවීමත් වෘත්තීය පීඩනය වැඩි කරන බවයි GMOA පෙන්වා දෙන්නේ.

2027 අයවැයට පෙර බදු රහිත ආදායම් සීමාව, බදු අනුපාත සහ ආදායම් කාණ්ඩ සංශෝධනය කරන ලෙස ජනාධිපති අනුර කුමාර දිසානායක වෙත යෝජනා ඉදිරිපත් කර ඇති බව ද වාර්තා වනවා.

කෙසේ වෙතත්, වෛද්‍යවරුන් රට හැර යන සංඛ්‍යාව පිළිබඳ විවිධ මූලාශ්‍රවල දත්ත වෙනස් වනවා.

සෞඛ්‍ය අමාත්‍යාංශය පාර්ලිමේන්තුවට ලබාදුන් දත්ත අනුව 2020 සිට 2025 දක්වා වෛද්‍යවරුන් 3,791ක් රටින් පිටත්ව ගොස් ඇති අතර, ඔවුන්ගෙන් සැලකිය යුතු පිරිසක් විදේශ විශේෂඥ පුහුණුව සඳහා ගිය අය බවයි රජය සඳහන් කර ඇත්තේ.