ඔස්ට්‍රේලියාවේ දරුණු කාලගුණික තත්ත්වයක් හේතුවෙන් තමන් භාවිත කරන Mobile Network එක ක්‍රියා විරහිත වුණොත්, වෙනත් ජාලයක් හරහා සම්බන්ධ වීමට පාරිභෝගිකයන්ට අද සිට නව අවස්ථාවක් ලැබෙනවා.

Temporary Disaster Roaming ලෙස හඳුන්වන මෙම වැඩසටහන යටතේ Telstra, Optus සහ TPG ජාල එකක් බිඳවැටුණු අවස්ථාවක, ආපදාවට ලක්වූ ප්‍රදේශයේ වෙනත් ජාලයක් ක්‍රියාත්මක නම් පාරිභෝගිකයන්ට එම ජාලයට ස්වයංක්‍රීයව සම්බන්ධ වීමට හැකි වනවා.

මෙම පහසුකම හරහා සාමාන්‍ය දුරකථන ඇමතුම් ලබාගැනීමට සහ කෙටි පණිවුඩ යැවීමට හැකි වන අතර, WhatsApp වැනි සේවා භාවිත කිරීමට ප්‍රමාණවත් සීමිත Data පහසුකමක්ද ලබාගත හැකි බවයි සඳහන් වන්නේ.

විශේෂයෙන් Bushfire, ගංවතුර සහ වෙනත් දරුණු කාලගුණික තත්ත්වයන් හේතුවෙන් Mobile Network එකක් බිඳවැටෙන අවස්ථාවලදී, ජනතාවට පවුලේ සාමාජිකයන් සහ හදිසි සේවා සමඟ සම්බන්ධව සිටීමට මෙම ක්‍රමය හඳුන්වා දී තිබෙනවා.

කෙසේ වෙතත් මෙම පහසුකම ප්‍රධාන නගරවලට අදාළ නොවන අතර, විකල්ප Mobile Network එකක් පවතින ප්‍රාදේශීය ප්‍රදේශවල පමණක් ක්‍රියාත්මක වන බව බලධාරීන් පෙන්වා දෙනවා.

එමෙන්ම එකවර ආපදා ප්‍රදේශ තුනක් දක්වා පමණක් මෙම සේවාව ක්‍රියාත්මක කළ හැකි අතර, එක් ප්‍රදේශයක Tower 15ක් දක්වා පමණක් ඊට ඇතුළත් කළ හැකි බවත් සඳහන්.

ඒ අනුව අද සිට ඔස්ට්‍රේලියාවේ ප්‍රාදේශීය ප්‍රදේශවල ජීවත් වන Mobile Phone පාරිභෝගිකයන්ට තමන්ගේ ප්‍රධාන ජාලය ආපදාවකදී බිඳවැටුණත්, වෙනත් ජාලයක් හරහා නැවත සම්බන්ධ වීමේ අමතර ආරක්ෂාවක් හිමි වනවා.