ඔස්ට්‍රේලියාවේ පළමු නිවාස ගැනුම්කරුවන් (First Home Buyers) අතුරින් 50%ක් මේ වනවිට ෆෙඩරල් රජය ක්‍රියාත්මක කරන ලද වැඩසටහන් හරහා නිවසක් මිලදී ගන්නා බව අගමැති ඇන්තනි ඇල්බනීසි පවසනවා.

ඊයේ නිකුත් කළ නිල දත්ත අනුව, 2022 සිට 5% Deposit Scheme යටතේ ඔස්ට්‍රේලියානුවන් 280,000කට වැඩි පිරිසකට නිවසක් මිලදී ගැනීමට සහාය ලැබී තිබෙනවා.

මෙම යෝජනා ක්‍රමය පුළුල් කළ 2025 ඔක්තෝබර් 1 සිට පසුගිය වසර තුළ පමණක් පළමු නිවාස ගැනුම්කරුවන් 102,594 දෙනෙකු එය භාවිත කර ඇති බවයි රජය පෙන්වා දෙන්නේ.

වික්ටෝරියාවේ 2022 සිට මින් සහාය ලැබූ සංඛ්‍යාව 89,375ක් වන අතර, පසුගිය වසර තුළ පමණක් 33,413 දෙනෙකු ඊට ඇතුළත් වී තිබෙනවා.

රජයේ ගණනය අනුව, අඩු තැන්පතුවක් හේතුවෙන් සාමාන්‍යයෙන් ගෙවීමට සිදුවන Lenders Mortgage Insurance වියදමෙන් ඔස්ට්‍රේලියානුවන්ට මේ දක්වා ඩොලර් බිලියන 2.5කට වැඩි මුදලක් ඉතිරි වී තිබෙනවා.

ජාතික මධ්‍යස්ථ නිවාස මිලකට 5% තැන්පතුවක් යොදා නිවසක් මිලදී ගන්නා පුද්ගලයෙකුට එම ඉතිරිය සාමාන්‍යයෙන් ඩොලර් 23,700ක් පමණ වන බවයි රජය සඳහන් කරන්නේ.