ඔස්ට්‍රේලියාවේ කාඩ් ගෙවීම් සඳහා අමතර ගාස්තු අය කිරීම ඔක්තෝබර් 1 සිට තහනම් කිරීමට නියමිත අතර, ඒ සමඟ බැංකු කිහිපයක් ක්‍රෙඩිට් කාඩ් ප්‍රතිලාභ සහ නොමිලේ ගමන් රක්ෂණ පහසුකම් අඩු කරමින් සිටිනවා.

මෙම වෙනස්කම් සමඟ ව්‍යාපාරවලින් බැංකු අය කරන ගනුදෙනු ගාස්තු සීමාද අඩු වන අතර, බැංකු ආදායමට වාර්ෂිකව ඩොලර් මිලියන 910ක් පමණ අහිමි විය හැකි බවයි වාර්තා වන්නේ.

ඒ හේතුවෙන් ප්‍රධාන බැංකු කිහිපයක් කාඩ් ගාස්තු ඉහළ දැමීම, ප්‍රතිලාභ වැඩසටහන් සීමා කිරීම සහ ගමන් රක්ෂණ වරප්‍රසාද අඩු කිරීම ආරම්භ කර තිබෙනවා.

නව නීතිවලින් පාරිභෝගිකයින්ට වසරකට ඩොලර් බිලියන 1.6ක් පමණ කාඩ් අමතර ගාස්තු ඉතිරි විය හැකි බව ඇස්තමේන්තු කර තිබෙනවා.

කෙසේ වෙතත්, ඇතැම් ව්‍යාපාර පවසන්නේ තමන්ට ගාස්තු අවශෝෂණය කරගැනීමට නොහැකි නම් භාණ්ඩ හා සේවා මිල ඉහළ දැමීමට සිදුවිය හැකි බවයි.

ඒ අනුව කාඩ් අමතර ගාස්තුව පාරිභෝගික බිල්පතෙන් අතුරුදන් වුවද, එම වියදම ඉහළ මිලක් හෝ බැංකු ගාස්තුවක් ලෙස නැවත පාරිභෝගිකයා වෙත පැමිණීමේ හැකියාව පවතිනවා.

එම නිසා නව ගෙවීම් නීතිවල සැබෑ වාසිය දැනගැනීමට, තම ක්‍රෙඩිට් කාඩ් ගාස්තු, ප්‍රතිලාභ සහ රක්ෂණ පහසුකම් නැවත සසඳා බැලීම වැදගත් බවයි විශේෂඥයින් පෙන්වා දෙන්නේ.