Sydney හි විද්‍යාඥයන් කෘත්‍රිම බුද්ධිය සඳහා භාවිත කරන පරිගණක අධික ලෙස උණුසුම් වීම පාලනය කිරීමට ලොව පළමු ආකාරයේ නව සිසිලන තාක්ෂණයක් සංවර්ධනය කරමින් සිටිනවා.

මෙහිදී cryogenic cooling තාක්ෂණය භාවිත කරමින් පරිගණක උපාංග ස්වභාවිකව පවතින උෂ්ණත්වයන්ටත් වඩා අඩු මට්ටමකට සිසිල් කිරීමට හැකි වන අතර, පරිගණක සිසිල් කළ විට ඒවා වඩා වේගයෙන් ක්‍රියා කළ හැකි බව පර්යේෂකයන් පෙන්වා දෙනවා.

මෙම තාක්ෂණය AI සඳහා භාවිත වන විශාල දත්ත මධ්‍යස්ථානවල පරිගණක සිසිල් කිරීමට අවශ්‍ය ජල ප්‍රමාණය සැලකිය යුතු ලෙස අඩු කිරීමට හැකියාවක් ඇති බව සඳහන් වෙනවා.

එමෙන්ම අනාගතයේදී දත්ත මධ්‍යස්ථාන සඳහා අවශ්‍ය බලශක්ති ප්‍රමාණය අඩු කර ගැනීමටත්, දැනට විශාල ජල සම්පත් අවශ්‍ය වන ස්ථාන වෙනුවට පුනර්ජනනීය බලශක්තියට ආසන්න ප්‍රදේශවල දත්ත මධ්‍යස්ථාන ස්ථාපිත කිරීමටත් මෙම තාක්ෂණයෙන් අවස්ථාවක් ලැබිය හැකි බව පර්යේෂකයන් පවසනවා.

University of Sydney ආශ්‍රිත Emergence Quantum ආයතනය සහ AirTrunk එක්ව මෙම cryogenic data centre තාක්ෂණය තවදුරටත් සංවර්ධනය කිරීමට කටයුතු කරමින් සිටින අතර, එහි අරමුණ AI සහ quantum computing සඳහා අවශ්‍ය ඉදිරි පරම්පරාවේ දත්ත මධ්‍යස්ථාන වඩා බලශක්ති කාර්යක්ෂම කිරීමයි.

Cryogenic cooling යටතේ සෙල්සියස් අංශක ඍණ 150කටත් අඩු උෂ්ණත්වයන් භාවිත වන අතර, quantum computing වැනි ඉදිරි පරම්පරාවේ පරිගණක තාක්ෂණයන් සඳහාද මෙවැනි අතිශය අඩු උෂ්ණත්වයන් වැදගත් වන බව University of Sydney සඳහන් කරනවා.

කෙසේ වෙතත් මෙම පර්යේෂණය විශාල දත්ත මධ්‍යස්ථාන මට්ටමින් සාර්ථකව භාවිත කළ හැකිද යන්න තවදුරටත් පරීක්ෂා කළ යුතු අතර, එය සාර්ථක වුවහොත් AI තාක්ෂණයේ වේගය සහ බලශක්ති කාර්යක්ෂමතාව ඉහළ නැංවීමට මෙන්ම දත්ත මධ්‍යස්ථානවල ජල භාවිතය අඩු කිරීමටද වැදගත් පියවරක් විය හැකියි.