ඔස්ට්‍රේලියාවේ සුපිරි වෙළඳසැල්වල අලෙවි කරන ඇතැම් ආහාර නිෂ්පාදනවල ලේබලයේ සඳහන් රට හෝ අඩංගු ද්‍රව්‍ය පිළිබඳ තොරතුරු සහ ස්වාධීන විද්‍යාත්මක පරීක්ෂණවල ප්‍රතිඵල අතර වෙනස්කම් ඇති බව අනාවරණය වී තිබෙනවා.

මාස අටක් පුරා සිදුකළ පරීක්ෂණයකදී තක්කාලි නිෂ්පාදන, කහ කුඩු, බිත්තර සහ මුහුදු ආහාර ඇතුළු නිෂ්පාදන සිය ගණනක් විද්‍යාත්මකව පරීක්ෂා කර ඇති අතර, ඇතැම් නිෂ්පාදන ලේබලයේ සඳහන් තොරතුරු සමඟ පරීක්ෂණ ප්‍රතිඵල නොගැළපෙන බව හෙළිවී තිබෙනවා.

විශේෂයෙන් තක්කාලි පේස්ට් සහ අනෙකුත් තක්කාලි නිෂ්පාදන කිහිපයක් පිළිබඳ සිදුකළ පරීක්ෂණවලදී, ඔස්ට්‍රේලියාවේ හෝ ඉතාලියේ නිෂ්පාදිත බව සඳහන් කර තිබූ ඇතැම් නිෂ්පාදනවල තක්කාලි චීනයෙන් ලබාගත් ඒවා බවට විද්‍යාත්මක පරීක්ෂණවලින් අනාවරණය වී තිබෙනවා.

එමෙන්ම කහ කුඩු නිෂ්පාදන කිහිපයක පිරිසිදුභාවය පිළිබඳ ගැටලු හඳුනාගෙන ඇති අතර, එක් වෙළඳ නාමයක කහ කුඩු සාම්පල කිහිපයක ආහාරයට එක් කිරීමට අවසර නොමැති lead chromate ඇතුළු ද්‍රව්‍ය පිළිබඳ සලකුණු හඳුනාගෙන තිබෙනවා.

බිත්තර සහ මුහුදු ආහාර සම්බන්ධයෙන්ද පරීක්ෂණ සිදුකර ඇති අතර, South Australia හි Woolworths වෙළඳ නාමය යටතේ cage-free ලෙස අලෙවි කළ ඇතැම් බිත්තර පිළිබඳ පරීක්ෂණ ප්‍රතිඵල එම ලේබලය සමඟ නොගැළපුණු බවත්, ඔස්ට්‍රේලියානු බව සඳහන් කළ ඇතැම් frozen seafood නිෂ්පාදනවල රට පිළිබඳ තොරතුරුද ප්‍රශ්නකාරී බවත් වාර්තා වී තිබෙනවා.

මෙම අනාවරණයෙන් පසුව Australian Competition and Consumer Commission හෙවත් ACCC විසින් පාරිභෝගිකයන් නොමඟ යවන ආහාර ලේබල් සහ ඇසුරුම් පිළිබඳ විමර්ශනයක් ආරම්භ කර ඇති අතර, අදාළ පරීක්ෂණ සහ වෙළඳ සමාගම්වල ප්‍රතිචාරද තවදුරටත් සලකා බලමින් සිටිනවා.

මේ අතර පරීක්ෂණවලට ලක්වූ ඇතැම් සමාගම් එම විද්‍යාත්මක ප්‍රතිඵල ප්‍රතික්ෂේප කර ඇති අතර, තම නිෂ්පාදන සැපයුම්කරුවන්ගෙන් ලබාගත් ලේඛන සහ පවතින තොරතුරු අනුව නිවැරදි බවට ඔවුන් ප්‍රකාශ කර ඇති බැවින්, මෙම කරුණු සම්බන්ධයෙන් අවසන් නීතිමය තීරණ තවමත් ප්‍රකාශයට පත්වී නැහැ.