වසර 35ක විරාමයකින් පසුව නැවතත් මේස පන්දුවට පිවිසි Melbourne හි අමල් ඩයස් , මේ වසරේ Australian Veterans National Championships තරගාවලියේදී Victoria ප්‍රාන්තය නියෝජනය කිරීමට සූදානම් වෙනවා.

අමල්ගේ මේස පන්දු ගමන ආරම්භ වුණේ වයස අවුරුදු 11දී ශ්‍රී ලංකාවේ ගල්කිස්ස ශාන්ත තෝමස් විද්‍යාලයේදී.

ඔහු සහභාගී වූ පළමු තරගාවලියේදීම අනුශූරතාව දිනාගත් අතර, එම තරගයේ ශූරයා වූයේ පසුව ශ්‍රී ලංකාවේ ප්‍රමුඛ පෙළේ මේස පන්දු ක්‍රීඩකයෙකු බවට පත්වූ ජගත් රාජපක්ෂයි.

1985 වසරේ ජපානයේ Nagoya නුවර පැවැත්වීමට නියමිත Junior Asian Games සඳහා සූදානම් වූ ශ්‍රී ලංකා කනිෂ්ඨ ජාතික සංචිතයට තේරී පත්වීම Amalගේ ක්‍රීඩා දිවියේ විශේෂ සන්ධිස්ථානයක්.

ඒ වනවිට ශ්‍රී ලංකාවේ කනිෂ්ඨ මේස පන්දු ශ්‍රේණිගත කිරීම්වල හයවන ස්ථානය දක්වා පැමිණ සිටි ඔහු, පාසල් කණ්ඩායමේ නායකත්වයද දැරුවා.

පාසල් සමයේදී පුද්ගල සහ කණ්ඩායම් ශූරතා රැසක් දිනාගත් අමල් , පසුව ක්‍රීඩාවෙන් ඈත්වී වසර 35ක පමණ කාලයක් ගත කළා.

නමුත් වසර හතරකට පෙර Greater Dandenong Table Tennis Club සමඟ එක්වීමෙන් පසුව ඔහු නැවතත් තරගකාරී ක්‍රීඩාවට පැමිණියා.

පසුගිය වසරේ Queensland හි පැවති Australian Veterans National Championships තරගාවලියේ Over-40 කාණ්ඩයෙන් Victoria නියෝජනය කිරීමටද අමල්ට අවස්ථාව ලැබුණා.

එම අත්දැකීමෙන් පසුව මෙවර තරගාවලියටත් සූදානම් වන ඔහු, මේ වතාවේ Over-50 කාණ්ඩයෙන් පිටියට පිවිසෙනවා.

ඔක්තෝබර් මාසයේ Albury හි පැවැත්වෙන ජාතික තරගාවලිය වෙනුවෙන් පුහුණුවීම් සිදුකරන අතරතුර, තමන්ගේ ගමනට ලැබෙන සහයෝගයද අමල් අගය කරනවා.

වසර ගණනාවක් ගතවුණත් තමන් ආදරය කරන ක්‍රීඩාවට නැවත පැමිණිය හැකි බව පෙන්වන ඔහුගේ ගමන, නව පරපුරේ ක්‍රීඩකයන්ටත් දිරිගැන්වීමක්.

තමන් සතු මේස පන්දු අත්දැකීම් සහ දැනුම තරුණ ක්‍රීඩකයන් සමඟ බෙදාගනිමින් ඔවුන්ව ඉදිරියට ගෙනයාම අමල්ගේ තවත් බලාපොරොත්තුවක්.

“වයස කියන්නේ තමන්ගේ ආශාව පසුපස යාම නතර කරන්න හේතුවක් නෙවෙයි” යන අදහස ඔහුගේ මේස පන්දු ගමනෙන් පැහැදිලි වෙනවා.