ඔස්ට්‍රේලියාවේ diesel මිල ලීටරයකට $3 සීමාවට ළඟා වෙමින් තිබීමත් සමඟ රියදුරන්ගේ ඉන්ධන වියදම් ගැන නැවතත් අවධානය යොමුව තිබෙනවා.

නවතම දත්ත අනුව රට පුරා diesel ලීටරයක මධ්‍යන්‍ය මිල ඩොලර් 2.88ක්. පසුගිය සතියේදී එය තවත් සෙන්ට් 1.67කින් ඉහළ ගොස් ඇති බවයි වාර්තා වන්නේ.

Sydney හි ඇතැම් ඉන්ධන පිරවුම්හල්වල diesel මිල දැනටමත් ඩොලර් 3 ඉක්මවා ගොස් ඇති අතර, මෙල්බන්හි මිල ගණන් ඩොලර් 2.62 සිට ඩොලර් 3.29 දක්වා වෙනස් වෙනවා.

Brisbane හි diesel මිල ඩොලර් 2.92ත් ඩොලර් 2.99ත් අතර මට්ටමකත්, Adelaide හි ඇතැම් ස්ථානවල ඩොලර් 3.10 දක්වාත් මිල ඉහළ ගොස් තිබෙනවා.

මෙම මිල ඉහළ යාමට ප්‍රධාන වශයෙන් බලපා ඇත්තේ මැදපෙරදිග ගැටුම් හේතුවෙන් ලෝක තෙල් සැපයුම් මාර්ගවල ඇතිවී තිබෙන බාධායි.

විශේෂයෙන් ලෝකයේ තෙල් සහ ගෑස් ප්‍රවාහනයේ වැදගත් මාර්ගයක් වන Strait of Hormuz හරහා සැපයුම්වලට ඇතිවී තිබෙන සීමා තෙල් වෙළඳපොළේ අවිනිශ්චිතතාව වැඩි කර තිබෙනවා.

කෙසේ වෙතත් අද වනවිට ජාත්‍යන්තර Brent crude මිල ඩොලර් 100ට පහළින් ගොස් තිබීමත් සමඟ ඉදිරියේදී ඉන්ධන මිලට යම් සහනයක් ලැබීමේ අවස්ථාවක් ගැන අවධානය යොමුව තිබෙනවා.

NRMA පෙන්වා දෙන්නේ ලෝක මට්ටමේ තෙල් මිල පහළ යාම දිගටම පැවතුණහොත් එහි බලපෑම ඉදිරියේදී ඔස්ට්‍රේලියානු ඉන්ධන මිලටත් දැනෙන්නට හැකි බවයි. නමුත් මැදපෙරදිග තත්ත්වය තවමත් වෙනස් වෙමින් පවතින නිසා මිල ගණන් ගැන නිශ්චිත අනාවැකියක් ලබාදීම අපහසු බවද සඳහන්.

මේ අතර රජයේ නවතම දත්ත අනුව ඔස්ට්‍රේලියාව සතුව petrol දින 41කට, diesel දින 31කට සහ jet fuel දින 32කට ප්‍රමාණවත් stock පවතින අතර, ඉදිරි සති කිහිපය සඳහා තවත් ඉන්ධන ප්‍රමාණයක් රටට පැමිණෙමින් තිබෙන බව බලධාරීන් පවසනවා.