කුඩා නිවසකට මාරුවීමට කැමැත්ත තිබුණත්, stamp duty ඇතුළු නිවස මාරු කිරීමේ වියදම් නිසා ඇතැම් ඔස්ට්‍රේලියානුවන්ට තමන් දැනට ජීවත් වන විශාල නිවාසවලම රැඳී සිටීමට සිදුවන තත්ත්වයක් පිළිබඳ අවධානය යොමුව තිබෙනවා.

විශේෂයෙන් දරුවන් නිවසින් ඉවත්ව ගිය පසු විශාල නිවසක තනිව හෝ දෙදෙනෙකු ලෙස ජීවත් වන “empty nesters” පිරිස අතරින් ඇතැමුන්ට කුඩා නිවසකට මාරුවීම ප්‍රායෝගිකව වඩාත් සුදුසු වුණත්, ඒ සඳහා වැයවන මුදල් බාධාවක් වී තිබෙනවා.

නිවසක් විකිණීමෙන් පසු නව නිවසක් මිලදී ගැනීමේදී ගෙවිය යුතු stamp duty, නීතිමය ගාස්තු, moving costs සහ අනෙකුත් වියදම් එකතුවීම නිසා එවැනි මාරුවක් සැලකිය යුතු වියදමක් බවට පත්වන බව වාර්තා පෙන්වා දෙනවා.

ඒ හේතුවෙන් තමන්ට අවශ්‍ය ප්‍රමාණයට වඩා විශාල නිවාසවලම රැඳී සිටින වැඩිහිටි නිවාස හිමියන් පිරිසක් සිටින බවත්, එය නිවාස වෙළෙඳපොළේ නිවාස භාවිතය සම්බන්ධයෙන්ද බලපෑමක් ඇති කරන බවත් සඳහන්.

කුඩා නිවාසවලට මාරුවීමට හැකි වුවහොත් විශාල නිවාස වෙළෙඳපොළට එකතු වීමෙන් පවුල් සඳහා වැඩි නිවාස ප්‍රමාණයක් ලබාගත හැකි බව නිවාස ක්ෂේත්‍රයේ අදහස් අතර තිබෙනවා.

නමුත් දැනට පවතින stamp duty සහ වෙනත් ගනුදෙනු වියදම් නිසා නිවාස හිමියන්ට එවැනි තීරණයක් ගැනීම පහසු නොවන බවයි මේ පිළිබඳ සාකච්ඡාවලදී අවධානයට ලක්වී තිබෙන්නේ.

ඒ අනුව, නිවාස ප්‍රමාණය පිළිබඳ පමණක් නොව, නිවසක් විකිණීමෙන් පසු වෙනත් නිවසකට මාරුවීමට වැයවන සමස්ත වියදමත් ඔස්ට්‍රේලියානුවන්ගේ නිවාස තීරණවලට බලපාන ප්‍රධාන සාධකයක් බවට පත්ව තිබෙනවා.