ඔස්ට්‍රේලියාව පමණක් නොව ඇමරිකාව, කැනඩාව, බ්‍රිතාන්‍යය සහ යුරෝපා රටවල් රැසක් මේ වනවිට සංක්‍රමණ නීති දැඩි කරමින් සිටින බව නව විශ්ලේෂණයකින් හෙළිවී තිබෙනවා.

ඔස්ට්‍රේලියානු රජය ශිෂ්‍ය වීසා හිමියන්, Working Holiday වීසා හිමියන්, එක් වීසාවකින් තවත් වීසාවකට මාරුවන පුද්ගලයන් සහ වීසා කාලය ඉක්මවා රැඳී සිටින්නන් ඉලක්ක කර නව සීමා හඳුන්වා දී තිබෙනවා.

2027 ජූලි දක්වා වසරේ ශුද්ධ විදේශ සංක්‍රමණය 292,100 සිට 245,000 දක්වා අඩුකර, ඉන්පසු වසරකට 225,000ක මට්ටමක පවත්වාගෙන යාම රජයේ ඉලක්කයයි.

දෙවැනි වසර සඳහා දීර්ඝ කරගත හැකි Working Holiday වීසා අවස්ථා 57,000 සිට 45,000 දක්වාත්, තුන්වැනි වසරේ අවස්ථා 31,000 සිට 5,000 දක්වාත් අඩු කිරීමට නියමිතයි.

වීසා කාලය ඉක්මවා ඔස්ට්‍රේලියාවේ රැඳී සිටින බවට ඇස්තමේන්තු කර ඇති පුද්ගලයන් 77,000කට එරෙහි පරීක්ෂණ දැඩි කර අවශ්‍ය අවස්ථාවල රඳවා තැබීමටද රජය සූදානම් වනවා.

එහෙත් ඇමරිකාවේ සිදුවන දැඩි පිටුවහල් කිරීම්වලට සාපේක්ෂව ඔස්ට්‍රේලියාව තවමත් සෞඛ්‍ය, ඉදිකිරීම් සහ අධ්‍යාපන වැනි සේවක හිඟයක් පවතින ක්ෂේත්‍ර සඳහා පුහුණු සංක්‍රමණිකයන්ට ප්‍රමුඛත්වය ලබාදීමට සැලසුම් කර තිබෙනවා.

කැනඩාවද තාවකාලික සංක්‍රමණිකයන්ගේ ප්‍රමාණය අඩුකරමින් සිටින අතර, බ්‍රිතාන්‍යය ස්ථිර පදිංචිය සඳහා අවශ්‍ය සාමාන්‍ය කාලය වසර පහේ සිට දහය දක්වා දෙගුණ කිරීමට යෝජනා කර තිබෙනවා.

ඒ අනුව ලෝක ප්‍රවණතාවය වී ඇත්තේ සංක්‍රමණය සම්පූර්ණයෙන් නතර කිරීම නොව, තාවකාලික වීසා පාලනය කර රටට අවශ්‍ය කුසලතා සහිත පුද්ගලයන් පමණක් වැඩි වශයෙන් තෝරාගැනීමයි.

මෙම තත්ත්වය යටතේ ඔස්ට්‍රේලියාවේ සිටින ශ්‍රී ලාංකික සිසුන් සහ තාවකාලික වීසා හිමියන් තම වීසා කාලසීමාව, පාඨමාලා මාරු කිරීම සහ ඉදිරි ස්ථිර පදිංචි මාර්ග පිළිබඳ නිල තොරතුරු අනුව කලින් සැලසුම් කිරීම ඉතා වැදගත් වනවා.

Credit – SBS News