‘වන් නේෂන්’ පක්ෂ නායිකා පෝලීන් හැන්සන් විසින් ආදිවාසී ජනතාව සහ අග්‍රාමාත්‍ය ඇන්තනි ඇල්බනීසිගේ දිවංගත මව සම්බන්ධයෙන් මීට පෙර සිදු කළ මතභේදාත්මක ප්‍රකාශයන් සම්බන්ධයෙන් කොන්දේසි සහිත සමාව අයැදීමක් සිදු කර තිබෙනවා.

පසුගිය සැප්තැම්බර් මාසයේ පොඩ්කාස්ට් සාකච්ඡාවකදී ආදිවාසී ජනතාව “the most primitive race on Earth” ලෙස හැඳින්වීම සහ පාසල් විෂයමාලාවල ඔවුන්ගේ ඉතිහාසයට වැඩි අවධානයක් යොමු කිරීම ඇය දැඩි ලෙස විවේචනය කර තිබුණා.

මෙම ප්‍රකාශය රට පුරා දැඩි දෝෂදර්ශනයට ලක් වූ අතර, එය ආදිවාසී නායකයින් සහ අමාත්‍යවරුන්ගේ දැඩි විවේචනයට ද ලක්වුණා.

මේ අතර, මාධ්‍ය වෙත අදහස් දක්වමින් පෝලීන් හැන්සන් සඳහන් කළේ තමන් එම ප්‍රකාශය මගින් අතීත ජනාවාසකරණ සමය අදහස් කළ බවත්, යම් අයෙකුට ඉන් වේදනාවක් සිදුවී නම් ඒ පිළිබඳ කණගාටු වන බවයි.

එමෙන්ම, අග්‍රාමාත්‍ය ඇල්බනීසිගේ මව වන Maryanne සිය ජීවිතයෙන් වැඩි කාලයක් Public housingවල ජීවත් වීම විවේචනය කරමින් ඇය සිදු කළ ප්‍රකාශය ද කිසිදු අවමන් සහගත අරමුණකින් කළ එකක් නොවන බව හැන්සන් වැඩිදුරටත් අවධාරණය කළා.

කෙසේ වෙතත්, අගමැතිවරයා ඇතුළු දේශපාලන පාර්ශ්ව මෙම ප්‍රකාශ දැඩි ලෙස ප්‍රතික්ෂේප කර තිබෙනවා.