ඔස්ට්‍රේලියාවේ සංක්‍රමණ ප්‍රතිපත්තිය දැඩි ලෙස වෙනස් කරන ලෙස ඉල්ලා අද Brisbane නගරයේ විරෝධතා පාගමනක් පවත්වා තිබෙනවා.

දහවල් 12ට Emma Miller Place, Roma Street Parklands අසලින් ආරම්භ වූ පාගමනට සිය ගණනක් එක්ව සිටි බව වාර්තා වනවා.

“Australia Marches National Tour to End Mass Immigration” යන ව්‍යාපාරය විසින් මෙය සංවිධානය කර තිබෙනවා.

විරෝධතාකරුවන් සංක්‍රමණිකයන්ගේ පැමිණීම වසර පහකට සීමා කර, අත්‍යවශ්‍ය නොවන visa නිකුත් කිරීම තාවකාලිකව නතර කරන ලෙස ඉල්ලා තිබෙනවා.

ඔවුන් පවසන්නේ ඉහළ සංක්‍රමණය නිසා නිවාස, කුලී මිල, රැකියා, වැටුප්, රෝහල් සහ යටිතල පහසුකම් මත දැඩි පීඩනයක් ඇතිවී තිබෙන බවයි.

වාර්ෂික සංක්‍රමණික පැමිණීම් 80,000කට සීමා කිරීම, student visa ක්‍රමය සංශෝධනය කිරීම සහ visa කාලය ඉක්මවා සිටින පුද්ගලයන්ට එරෙහිව දැඩි පියවර ගැනීමද සංවිධායකයන්ගේ ඉල්ලීම් අතර වනවා.

One Nation නායිකා Pauline Hanson මෙයට සහභාගී වීමට නියමිතව සිටියත්, ආරක්ෂාව සම්බන්ධයෙන් ඇතිවූ ගැටලු හේතුවෙන් අවසන් මොහොතේ ඉවත් වී ඇති බවයි වාර්තා වන්නේ.