කාන්තාවන් මුහුණදෙන වේදනාව නිසි ලෙස හඳුනාගෙන, ඒ සඳහා සුදුසු ප්‍රතිකාර ලබාදීම තහවුරු කිරීමේ අරමුණින් Victoria රජය ඔස්ට්‍රේලියාවේ පළමු Women’s Pain Standard හඳුන්වා දී තිබෙනවා.

Victoria හි රාජ්‍ය සෞඛ්‍ය පද්ධතිය තුළ කාන්තාවන්ගේ වේදනාව සම්බන්ධයෙන් පවතින gender bias සහ ඔවුන්ගේ වේදනා පැමිණිලි ප්‍රමාණවත් ලෙස සැලකිල්ලට නොගැනීම වැනි ගැටලු අවම කිරීම මෙහි ප්‍රධාන අරමුණයි.

නව ප්‍රමිතිය යටතේ සෞඛ්‍ය සේවා සපයන්නන් කාන්තාවන්ගේ වේදනාව වඩාත් සැලකිල්ලෙන් තක්සේරු කර, ඔවුන්ගේ රෝග ලක්ෂණ පිළිබඳව නිසි අවධානය යොමු කර, අවශ්‍ය ප්‍රතිකාර වෙත යොමු කිරීමට අපේක්ෂා කෙරෙනවා.

මෙම තීරණයට පසුබිම් වී ඇත්තේ Victoria හි පැවති Women’s Pain Inquiry එක වන අතර, ඒ සඳහා කාන්තාවන් සහ ගැහැණු ළමුන් 13,000කට වැඩි පිරිසක් සිය අත්දැකීම් සහ අදහස් ඉදිරිපත් කර තිබෙනවා.

එම විමර්ශනයේදී ඇතැම් කාන්තාවන් තමන් අත්විඳින වේදනාව සෞඛ්‍ය සේවා පද්ධතිය තුළ ප්‍රමාණවත් ලෙස පිළිගැනීමට ලක් නොවන බවත්, ඒ හේතුවෙන් නිවැරදි රෝග විනිශ්චය සහ ප්‍රතිකාර ලබාගැනීම ප්‍රමාද වන අවස්ථා පවතින බවත් පෙන්වා දී තිබුණා.

විශේෂයෙන් දිගුකාලීන වේදනාව, මාසික වේදනාව, endometriosis වැනි කාන්තාවන්ට බලපාන තත්ත්වයන් සම්බන්ධයෙන් ඉක්මන් හඳුනාගැනීම සහ වඩාත් ගුණාත්මක සෞඛ්‍ය සේවාවක් ලබාදීමේ අවශ්‍යතාව මෙම පියවර මගින් අවධාරණය කරනවා.

Victoria රජය පවසන්නේ මෙම නව Women’s Pain Standard හරහා කාන්තාවන්ගේ වේදනාව නොසලකා නොහැර, ඔවුන්ගේ අත්දැකීම් විශ්වාසයෙන් පිළිගෙන, සෞඛ්‍ය සේවාව තුළ වඩාත් සාධාරණ සහ කාන්තාවන් කේන්ද්‍ර කරගත් ප්‍රතිකාර ක්‍රමයක් ඇති කිරීම අපේක්ෂා කරන බවයි.