ඔස්ට්‍රේලියාවේ Queensland ප්‍රාන්තයේ Middle Percy Island හි වසරක කාලයක් පමණ ස්වේච්ඡා සේවකයන් ලෙස ජීවත් වීමට කැමති පුද්ගලයන් සොයමින් සිටින බව වාර්තා වනවා.

Mackay නගරයට කිලෝමීටර් 125ක් පමණ දකුණු-නැගෙනහිරින් පිහිටි මෙම සුන්දර නිවර්තන දූපතේ නවාතැන් සඳහා ගාස්තුවක් අය නොකෙරෙන අතර, එහි ජීවන රටාව සාමාන්‍ය නගර ජීවිතයට වඩා සම්පූර්ණයෙන්ම වෙනස්.

ස්වේච්ඡා සේවකයන්ගෙන් දූපතේ යටිතල පහසුකම් නඩත්තු කිරීම, උද්‍යාන සහ මී මැසි ගොවිපළ රැකබලා ගැනීම, සතුන්ගේ සංඛ්‍යාව පාලනය කිරීම සහ දූපතට පැමිණෙන නාවිකයන්ට ආගන්තුක සත්කාර ලබාදීම වැනි කටයුතු බලාපොරොත්තු වනවා.

දූපතේ දැනට ජීවත් වන පිරිස ඉතා සීමිත වන අතර, එහි ජීවත්වන අය තමන්ට අවශ්‍ය ආහාර වගා කිරීම, මුහුදෙන් ලබාගැනීම සහ වැසි ජලය භාවිත කිරීම වැනි ක්‍රම මත බොහෝ දුරට රඳා පවතින බව සඳහන්.

නිතිපතා ප්‍රධාන භූමිය සමඟ ප්‍රවාහන සම්බන්ධතාවක් නොමැති වීම නිසා, මෙහි ජීවත්වීමට යන පුද්ගලයන්ට ස්වයංපෝෂිතව සහ හුදෙකලා පරිසරයක ජීවත් වීමට හැකි වීම අත්‍යවශ්‍ය බවද වාර්තා වනවා.

දූපතේ ජීවත් වන අයගේ දෛනික කටයුතු අතර උද්‍යානවලට ජලය සැපයීම, කුකුළන් රැකබලා ගැනීම, මී පැණි නිෂ්පාදනය සහ අවශ්‍ය නඩත්තු කටයුතුද ඇතුළත් වන බව සඳහන්.

ඒ අනුව, මුදල් ගෙවා නිවාඩුවක් ගත කරනවා වෙනුවට පරිසර සංරක්ෂණයට දායක වෙමින් සුන්දර දූපතක ජීවත් වීමට ලැබෙන මෙම අවස්ථාව, වෙනස්ම ජීවන අත්දැකීමක් සොයන පුද්ගලයන් අතර විශේෂ අවධානයක් දිනාගෙන තිබෙනවා.