Melbourneහි Surrey Hills ප්‍රදේශයේ පිහිටි ඓතිහාසික Wattle Park Chalet ගොඩනැගිල්ල ගින්නකට හසුවීමත් සමඟ, එහි පැවැත්වීමට නියමිතව තිබූ මංගල උත්සවයක් හදිසියේම වෙනත් ස්ථානයකට මාරු කිරීමට සිදුව තිබෙනවා.

සැප්තැම්බර් 12 වැනිදා උදෑසන 6.32ට පමණ හදිසි සේවා අංශ වෙත ගින්න පිළිබඳ දැනුම් දී ඇති අතර, ගිනි නිවන භටයන් පැමිණෙන විට ගොඩනැගිල්ලේ වහලය ඇතුළු කොටස් ගිනිගෙන තිබූ බව සඳහන්.

උදෑසන 8ට පෙර ගින්න පාලනය කිරීමට හැකිව තිබුණද, ගින්න, දුම සහ ජලය හේතුවෙන් ගොඩනැගිල්ලේ ප්‍රධාන ශාලාවට දැඩි හානි සිදුව ඇති බව Fire Rescue Victoria පවසනවා.

ගොඩනැගිල්ලෙන් ආසන්න වශයෙන් 30%කට හානි සිදුව ඇති අතර, ගින්න එහි මුළුතැන්ගෙය සහ සේවා ප්‍රදේශවලටද බලපා ඇති බව සඳහන්.

විශේෂත්වය වන්නේ එදින සවස පුද්ගලයන් 110කට ආසන්න පිරිසක් සහභාගී වීමට නියමිතව තිබූ මංගල උත්සවයක් එම ස්ථානයේ පැවැත්වීමට සියලු කටයුතු සූදානම් කර තිබීමයි.

දින දෙකක් පුරා මංගල උත්සවය සඳහා සූදානම් කර තිබූ මල් මේස මත සකස් කර තිබූ අතර ආහාරද සූදානම් කර තිබියදී ගින්න ඇතිවීමෙන්, මනාල යුවළට අවසන් මොහොතේ වෙනත් ස්ථානයක් සොයාගැනීමට සිදුව තිබෙනවා.

1928 වසරේ සිට උත්සව සහ මංගල අවස්ථා සඳහා භාවිත කර ඇති මෙම ඓතිහාසික ගොඩනැගිල්ලට සිදුවූ හානිය සම්බන්ධයෙන් විමර්ශන ක්‍රියාත්මක වන අතර, ගින්නට හේතුව මෙතෙක් අනාවරණය වී නොමැති අතර එය සැකසහිත ගින්නක් ලෙසද පරීක්ෂා කරමින් සිටින බව වාර්තා වනවා.