කැන්බරාහි පිහිටි පාර්ලිමේන්තු මන්දිරය අසලදී, accessibility ක්‍රියාකාරිනියක ලෙස කටයුතු කරන තරුණියකට, wheelchair එකක් භාවිත කිරීම හේතුවෙන් ප්‍රවාහන සේවා සැපයීම ප්‍රතික්ෂේප කිරීමේ පුවතක් වාර්තා වනවා.

Rosie Putland නම් මෙම තරුණිය කැන්බරාහි ඇයගේ නව රැකියාවේ පළමු සතිය ගත කරමින් සිටියදී මෙම අත්දැකීමට මුහුණ දී තිබෙනවා.

ඇය සහ ඇගේ සගයකු පාර්ලිමේන්තු මන්දිරය අසල පිහිටි taxiයක් වෙත ගිය අවස්ථාවේදී, රියදුරෙකු ඇයව රැගෙන යාම ප්‍රතික්ෂේප කර ඇති බව සඳහන්.

ඇයගේ collapsible wheelchair එක සාමාන්‍ය ගමන් මල්ලක ප්‍රමාණය ගන්නා බවත්, කිසිදු අමතර උදව්වක් නොමැතිව තමාට එය කුඩා මෝටර් රථයක boot එකට දැමිය හැකි බවත් ඇය රියදුරුට පැහැදිලි කර දී තිබෙනවා.

එහෙත්, රියදුරු පවසා ඇත්තේ ඇයව රැගෙන යාමට නොහැකි අතර තමාට ඊට අවශ්‍යතාවක් නොමැති බවයි.

එම සතියේම යළිත් රැකියාවට යන අතරතුර ඇය ඇණවුම් කළ Uber රියදුරු ද ඇය wheelchair එකක් භාවිත කරන බව දැනගත් පසු එම ගමන අවලංගු කරන ලෙස ඉල්ලා තිබෙනවා.

ඇය පවසන්නේ කිසිදු පදනමකින් තොරව රියදුරන් තමා පිළිබඳව වැරදි පූර්ව නිගමනවලට එළඹීම කණගාටුවට කරුණක් බවයි.

ඔස්ට්‍රේලියානු ෆෙඩරල් ආබාධිත වෙනස්කම් කිරීම් පනතට (Disability Discrimination Act) අනුව, ආබාධිත පුද්ගලයින්ට Taxi හෝ rideshare සේවා ඇතුළු ප්‍රසිද්ධ ප්‍රවාහන සේවා ප්‍රතික්ෂේප කිරීම නීතිවිරෝධී වනවා.

මේ අතර ආබාධිත සුභසාධක සංවිධාන පවසන්නේ මෙවැනි සිදුවීම් wheelchair භාවිත කරන පුද්ගලයන් මුහුණදෙන පුළුල් ප්‍රවාහන වෙනස්කම්වල කොටසක් බවයි.