තායිලන්තයේදී, 17 හැවිරිදි තරුණියක ඝාතනය කර ඇගේ මළ සිරුර සූට්කේස් එකක බහා දමා යාමේ සිද්ධිය සම්බන්ධයෙන් අත්අඩංගුවට පත්ව සිටින ඔස්ට්‍රේලියානු ජාතික Simon Peter Carman, පළමු වරට අධිකරණය හමුවට ඉදිරිපත් කර තිබෙනවා.

එහිදී ඔහු තමාට එල්ල වී ඇති චෝදනා සියල්ල ප්‍රතික්ෂේප කර ඇති බවයි වාර්තා වන්නේ.

ඔහුට එරෙහිව හිතාමතාම මිනීමැරීම, මළ සිරුරක් සඟවා තැබීම, මළ සිරුරක් ඉවත් කිරීම හෝ විනාශ කිරීම සහ අනාචාරී අරමුණු සඳහා බාලවයස්කාර දැරියක් පැහැර ගැනීම ඇතුළු චෝදනා 4ක් ගොනු කර තිබෙනවා.

මෙම චෝදනා ප්‍රතික්ෂේප කළ සැකකරු, තමන් මෙම අපරාධය සිදු කළේ ආත්මාරක්ෂාව සඳහා බවයි අධිකරණයට ප්‍රකාශ කර ඇත්තේ.

මේ අතර තමා ඇප මත මුදාහරින ලෙස ඔහු ඉල්ලා සිටියද, රජයේ නීතිඥවරුන් ඊට දැඩි ලෙස විරුද්ධ වී තිබෙනවා.

පසුගිය ජූනි මස 25 වනදා Pattaya Beach Road ප්‍රදේශයෙන් තරුණිය සිය මහල් නිවාසය වෙත රැගෙන ගොස් ඇති මෙම ඔස්ට්‍රේලියානුවා, පසුව ඇය මරා දමා සිරුර සූට්කේස් එකකට දමා දුම්රිය මාර්ගයක් අසලට වීසි කර ඇති බවයි පොලිසිය පවසන්නේ.

පසුව පර්ත් නුවර වෙත පලා යාමට උත්සාහ කරමින් සිටි ඔහු බැංකොක් ගුවන්තොටුපළේදී අත්අඩංගුවට ගැණුනා.

ඔහුගේ නඩු විභාගය සඳහා මාස 6ත් 8ත් අතර කාලයක් ගත විය හැකි බව නීතිඥවරුන් පවසන අතර මීළඟ සාක්ෂි විමසීම ලබන ඔක්තෝබර් මස 12 වන දිනට නියම කර තිබෙනවා.