ඔස්ට්‍රේලියානු රජය Working Holiday Maker හෙවත් Backpacker වීසා පද්ධතිය දැඩි කිරීමට ගත් නව තීරණය හේතුවෙන් කෘෂිකාර්මික සහ සංචාරක ක්ෂේත්‍රවල කම්කරු හිඟය තවත් බරපතළ විය හැකි බවට කර්මාන්ත නායකයින් අනතුරු අඟවා තිබෙනවා.

නව ක්‍රමය යටතේ දෙවන වසර සඳහා රැඳී සිටීමට අවසර ලබාදෙන Backpackers සංඛ්‍යාව 57,000 සිට 45,000 දක්වා සීමා කිරීමට නියමිතයි.

තුන්වන වසර සඳහා දැනට 31,000ක් පමණ සුදුසුකම් ලැබුවද, නව ballot ක්‍රමය යටතේ එය 5,000කට දැඩි ලෙස සීමා කිරීමටයි රජය සැලසුම් කර ඇත්තේ.

දෙවන වසර සඳහා අයදුම් කිරීමට දින 88ක regional work අවශ්‍යතාවත්, තුන්වන වසර සඳහා මාස හයක regional work අවශ්‍යතාවත් අඛණ්ඩව පවතිනවා.

National Farmers’ Federation පවසන්නේ Backpacker කම්කරුවන් අඩුවීම අස්වැන්න නෙළීමේ කාලයේදී ගොවීන්ට දැඩි ගැටලුවක් ඇති කළ හැකි අතර, අවසානයේ ආහාර මිල ඉහළ යාමට ද බලපෑ හැකි බවයි.

මේ අතර බටහිර ඔස්ට්‍රේලියාවේ පමණක් peak season කාලවල Backpacker සේවකයින් 4,500ක් පමණ අහිමි විය හැකි අතර, එමගින් සංචාරක වියදම් ඩොලර් මිලියන 62කට පමණ සහ දේශීය රැකියා 425කට බලපෑමක් ඇතිවිය හැකි බවටයි Tourism Council WA අනතුරු අඟවන්නේ.

කෙසේ වෙතත් Home Affairs Minister Tony Burke පවසන්නේ Net Overseas Migration අඩු කිරීමට රජය සැබෑවටම උත්සාහ කරන්නේ නම් Backpacker වීසා කාණ්ඩය ද එම සැලැස්මෙන් ඉවත් කළ නොහැකි බවයි.