සිඩ්නි නගරයේ බස් රථයක ගමන් කරමින් සිටි 13 හැවිරිදි මුස්ලිම් පාසල් දැරියකට වාර්ගික සහ ඉස්ලාම් විරෝධී අපහාස කළ බවට 50 හැවිරිදි පුද්ගලයෙකුට චෝදනා ගොනුකර තිබෙනවා.

සම්පූර්ණ පාසල් නිල ඇඳුමෙන් සහ හිජාබයකින් සැරසී සිටි දැරිය සැප්තැම්බර් 10 වැනිදා ස්ට්‍රැත්ෆීල්ඩ් දුම්රිය ස්ථානයේ සිට ග්‍රීන්ඇක දක්වා ගමන් කරමින් සිටියදී මෙම සිද්ධියට මුහුණදී තිබෙනවා.

සැකකරු දැරියට “terrorist” ඇතුළු වාර්ගික අපහාසාත්මක වචන භාවිත කරමින් ඇයට ඔස්ට්‍රේලියාවේ සිටීමට අයිතියක් නොමැති බව පැවසූ බවට චෝදනා එල්ල වී තිබෙනවා.

සිද්ධියේ වීඩියෝවක් සමාජ මාධ්‍ය ඔස්සේ පැතිරීමෙන් පසුව නිව් සවුත්වේල්ස් පොලීසිය විසින් විමර්ශනයක් ආරම්භ කර තිබුණා.

සැකකරු ග්‍රීන්ඇකහි නිවසකදී අත්අඩංගුවට ගෙන ශාරීරික හානියක් පිළිබඳ බියක් ඇතිවන ආකාරයෙන් හිරිහැර කිරීම හෝ තර්ජනය කිරීම සම්බන්ධයෙන් චෝදනා ගොනුකර තිබෙනවා.

ඔහුට ඇප ලබාදීම ප්‍රතික්ෂේප කර ඇති අතර අධිකරණය වෙත ඉදිරිපත් කිරීමට නියමිතයි.

ඔස්ට්‍රේලියාව තුළ වාර්තා වන ඉස්ලාම් විරෝධී සිද්ධීන් පසුගිය වසර තුනේදී හය ගුණයකින් වැඩිවී ඇති බවයි වාර්තා වන්නේ.