විදේශ රටක උපත ලබා, හැදී වැඩුණද, සාම්ප්‍රදායික කලා සංස්කෘතිය ලෝකයා හමුවේ බබළවමින් ශ්‍රී ලාංකික නාමය ඉහළට ඔසවා තැබූ අපූරු පුවතක් මෙල්බන්වලින් වාර්තා වනවා.

මෙල්බන්හි “Tharanga Arts Academy” කලායතනයේ ආචාර්ය නදී තරංගාගේ මඟපෙන්වීම යටතේ කලාව හදාරන ලද ඔස්ට්‍රේලියාවේ ජීවත්වන දරුවන් පිරිසක්, මෙවර ඓතිහාසික මහනුවර ශ්‍රී දළදා ඇසළ පෙරහැර මංගල්‍යයේ බෙර වාදනය සඳහා එක්වෙමින් ලෝක ඉතිහාසයට එක්වූනා.

පාසල් අවධියේ සිටම ශ්‍රී ලාංකේය උඩරට, පහතරට නර්තන මෙන්ම බෙර වාදනය සහ ජන ගායනය ප්‍රගුණ කර ඇති නදී තරංගා, 2016 වසරේ සිට මෙල්බන්හි මෙම කලායතනය පවත්වාගෙන යමින් මතු පරපුරට හෙළ කලාව දායාද කරමින් සිටිනවා.

ඇයගේ කලායතනයේ දශකයක යුගය සම්පූර්ණ වීම වෙනුවෙන් පැවති “මංගලම්” සංස්කෘතික මංගල්‍යය සඳහා ප්‍රධාන ආරාධිතයා ලෙස සම්මානනීය ජ්‍යෙෂ්ඨ මහාචාර්ය මුදියන්සේ දිසානායක මහතා සහභාගී වුණා.

එහිදී එම දරුවන් කිසිදු ප්‍රවීණයෙකුගේ සහයකින් තොරව තමන් විසින්ම ඉතා දක්ෂ ලෙස බෙර වාදනය කිරීම මහාචාර්යතුමාගේ දැඩි ප්‍රශංසාවට ලක්වුණා.

විදේශයක සිටින දරුවන් මෙලෙස බෙර වාදනය ප්‍රගුණ කර තිබීම අසිරිමත් මවිතයට කරුණක් ලෙස සඳහන් කළ මහාචාර්යතුමා, එම දරුවන්ට මෙවර ශ්‍රී දළදා ඇසළ පෙරහැරේ බෙර වාදනය කිරීමේ දුර්ලභ අවස්ථාව උදාකර දුන්නා.

ඒ අනුව, ඇලික් බෝපේ ජයවර්ධන, නදීශාන් ජයවීර, කවිත් විජේසූරිය සහ දිනෙන් විජේසූරිය යන තරුණ දරුවන් 4දෙනා, පාරම්පරික නර්තන ශිල්පී සංජීව වේරපිටියගේ නායකත්වයෙන් යුත් කණ්ඩායම සමඟ සිය දක්ෂතා එළිදක්වමින් උඩරට බෙර වාදනය ඉදිරිපත් කළා.

විදේශයක ඉපදී හැදුණු වැඩුණු දරුවන් පිරිසක් දළදා පෙරහැරේ බෙර වාදනය කළ ඉතිහාසයේ ප්‍රථම අවස්ථාව මෙය ලෙසයි සටහන් වන්නේ.