Sydneyහි 16 හැවිරිදි දැරියකගේ මරණයෙන් පසුව, ලිංගික ක්‍රියා අතරතුර ගෙල සිර කිරීමේ අවදානම පිළිබඳ දරුවන් සමඟ වහාම කතා කරන්නැයි විශේෂඥයන් දෙමාපියන්ගෙන් ඉල්ලා සිටිනවා.

මෙවැනි ක්‍රියා සඳහා ගෙලට යොදන සුළු පීඩනයකින් වුවද මොළයට ලැබෙන ඔක්සිජන් සහ රුධිර සැපයුම අවහිර විය හැකියි.

එයින් සිහිසුන් වීම, මොළයට හානි වීම, ආඝාතය හෝ මරණය පවා සිදුවිය හැකි බවයි විශේෂඥයන් පෙන්වා දෙන්නේ.

සමාජ මාධ්‍ය සහ අසභ්‍ය වීඩියෝ මගින් මෙය සාමාන්‍ය සහ ආරක්ෂිත ක්‍රියාවක් ලෙස තරුණයන් අතර වැරදි අදහසක් ඇතිකර තිබෙනවා.

2024දී සිදුකළ ඔස්ට්‍රේලියානු අධ්‍යයනයකට අනුව, වයස අවුරුදු 18ත් 35ත් අතර පිරිසෙන් සියයට 57ක් මෙවැනි අත්දැකීමකට මුහුණදී හෝ එවැනි ක්‍රියාවක නිරතවී තිබෙනවා.

මෙහි කිසිදු ආරක්ෂිත ක්‍රමයක් නොමැති බවත්, කැමැත්ත පළකර තිබුණද බරපතළ හානියක් හෝ මරණයක් සිදුවීමේ නීතිමය වගකීම ඉවත් නොවන බවත් විශේෂඥයන් අවධාරණය කරනවා.

දරුවන්ට දොස් නොකියා, ඔවුන්ගේ වයසට ගැළපෙන ආකාරයෙන් ආරක්ෂාව, කැමැත්ත සහ සීමාවන් පිළිබඳ විවෘතව කතා කිරීම අත්‍යවශ්‍ය බවයි වාර්තා පෙන්වාදෙන්නේ.