පිහි ඇතුළු භයානක ආයුධ රැගෙන යාම වැළැක්වීමේ අරමුණින් වික්ටෝරියා ප්‍රාන්තයේ පොලිසියට පුළුල් සෝදිසි බලතල ලබාදීමේ සැලැස්මක් ඉදිරිපත් කර තිබෙනවා.

නොවැම්බර් මාසයේ පැවැත්වීමට නියමිත ප්‍රාන්ත මැතිවරණයෙන් නැවත බලයට පත්වුවහොත් Jack’s Law හඳුන්වාදීමට කටයුතු කරන බව Victorian Labor පක්ෂය ප්‍රකාශ කර ඇති බව ABC News වාර්තා කරනවා.

ඒ යටතේ ලබන වසරේ මුල් භාගයේ සිට Victoria Police වෙත අමතර handheld metal detectors 1,200ක් ලබාදීමට නියමිත අතර, පොදු ස්ථානවල පුද්ගලයන් සෝදිසි කිරීම සඳහා ඒවා භාවිත කිරීමට හැකියාව ලැබෙනු ඇති.

2019 වසරේ Gold Coastහිදී පිහි ඇනුමකින් මියගිය තරුණයෙකු වූ Jack Beasley සිහිපත් කරමින් මෙම නීතිය Jack’s Law ලෙස නම් කර ඇති අතර, ඔහුගේ පවුලේ සාමාජිකයන් ද මෙම නීති වෙනස වෙනුවෙන් දිගු කාලයක් පෙනී සිට තිබෙනවා.

කෙසේ වෙතත්, අපරාධ විද්‍යාඥයන් පෙන්වා දෙන්නේ පුළුල් stop-and-search බලතල ලබාදීමෙන් පිහි රැගෙන යාම හෝ ප්‍රචණ්ඩ අපරාධ අඩු කළ හැකි බවට ප්‍රමාණවත් සාක්ෂි නොමැති බවයි.

Queenslandහි ක්‍රියාත්මක Jack’s Law සම්බන්ධයෙන් සිදුකළ අධ්‍යයනයකින්ද, එම සෝදිසි ක්‍රමය අපරාධ අඩු කිරීමට සෘජු බලපෑමක් කළ බව තහවුරු කිරීමට සාක්ෂි නොමැති බව සඳහන් කර තිබෙනවා.

මේ අතර, අයිතිවාසිකම් සංවිධාන අවධාරණය කරන්නේ නව බලතල ක්‍රියාත්මක කිරීමේදී ඇතැම් ප්‍රජාවන් අසමාන ලෙස පොලිස් සෝදිසිවලට ලක්වීමේ අවදානම පිළිබඳවද අවධානය යොමු කළ යුතු බවයි.