Student Visa ලාභීන්ට සිය වීසා බලපත්‍රය හරහා පවුලේ සාමාජිකයන් සහ සහකරුවන් හෝ සහකාරියන් ඔස්ටේ්‍රලියාවට ගෙන්වා ගැනීමට ඇති අවස්ථා කප්පාදු කිරීමට ලේබර් රජය දැඩි තීරණයක් ගෙන තිබෙනවා.

අගමැති ඇන්තනී ඇල්බනීසි ලබන සිකුරාදා අමෙරිකා සංචාරයකට පිටත්ව යාමට පෙර ලේබර් රජය විසින් නව සැලැස්මක නිල වශයෙන් ප්‍රකාශයට පත් කිරීමට නියමිතයි.

ස්වදේශ කටයුතු දෙපාර්තමේන්තුව ජාත්‍යන්තර සිසුන්ගේ පවුල් සාමාජිකයන් සහ dependents සඳහා වන visa සම්බන්ධයෙන් දැඩි පියවර ගැනීමට සූදානම් වන බව සඳහන්.

ජ්‍යෙෂ්ඨ අමාත්‍යවරුන් තහවුරු කර ඇත්තේ නව සැලැස්ම බ්‍රහස්පතින්දා ප්‍රකාශයට පත් කිරීමට නියමිත බවයි.

ඒ අතර, ඕස්ට්‍රේලියාව තුළ සිටින skilled workersගේ visa අයදුම්පත්වලට ප්‍රමුඛතාව ලබාදීම / විදේශයන්හි සිට පවුල් නැවත එක්වීම සඳහා ඉදිරිපත් කරන visa අයදුම්පත් වේගවත් කිරීම සහ එකතු වී ඇති bridging visa අයදුම්පත් ඉක්මනින් සලකා බැලීම වැනි පියවර ගැනීමට රජය සැලසුම් කර ඇති බව සඳහන්.

මේ අතර නව ජනමත විමසුමකින්ද ඕස්ට්‍රේලියානුවන් අතර සංක්‍රමණ සම්බන්ධයෙන් දැඩි පාලනයක් අවශ්‍ය බවට මතය ඉහළ ගොස් ඇති බව අනාවරණ වී තිබුණා.

60%කට වැඩි පිරිසක් වාර්ෂික refugee intake එක 20,000 සිට 13,000 දක්වා අඩු කිරීමට කැමැත්ත පළ කර තිබෙනවා.

48%ක් ජාත්‍යන්තර සිසුන් සඳහා partner සහ family visas ලබාදීම තහනම් කිරීමට සහාය දක්වා තිබෙනවා.

40%ක් රජය සැලසුම් කර ඇති net migration 301,000 සිට 225,000 දක්වා අඩු කිරීම පවා තවමත් වැඩි බව පවසනවා.

ඔස්ට්‍රේලියාවට පැමිණෙන සංක්‍රමණිකයන්ගේ සංඛ්‍යාව අඛණ්ඩව පහළ දැමීමට රජය කටයුතු කරන බව නියෝජ්‍ය අගමැති Richard Marles ද තහවුරු කළා.

ඊයේ රූපවාහිනී සම්මුඛ සාකච්ඡාවකට එක්වෙමිනුයි ඔහු මේ බව සඳහන් කළේ.

මෙම මූල්‍ය වසරේ ශුද්ධ සංක්‍රමණික සංඛ්‍යාව 245,000කට සීමා කිරීම රජයේ ඉලක්කය වන අතර ඊළඟ මූල්‍ය වසරේදී එය තවත් 20,000කින් අඩුකර 225,000 දක්වා ගෙන ඒමට සැලසුම් කර තිබෙනවා.

සංක්‍රමණය ඉහළම මට්ටමක පැවති කාලයට සාපේක්ෂව මේ වනවිට 40%ක පමණ අඩුවීමක් සිදුකර ඇති බවයි Marles ප්‍රකාශ කළේ.

ජාත්‍යන්තර සිසුන් ඉලක්ක කර හඳුන්වාදුන් සීමා සහ දැඩි පාලන ක්‍රියාමාර්ගද මෙම අඩුවීමට ප්‍රධාන වශයෙන් බලපා ඇති බවද ඔහු කියාසිටියා.

ඒ අනුව ඔස්ට්‍රේලියාවේ පවතින නිවාස, ප්‍රවාහන සහ අනෙකුත් පොදු සේවා මත ඇති පීඩනය සැලකිල්ලට ගනිමින්, ආර්ථිකයට අවශ්‍ය skilled workers සහ අත්‍යවශ්‍ය සේවකයන්ගේ පැමිණීම පවත්වාගෙන යන අතරම සමස්ත සංක්‍රමණික සංඛ්‍යාව සැලසුම් සහගතව අඩු කිරීම රජයේ ඉදිරි ප්‍රධාන අරමුණ වී තිබෙනවා.

කෙසේවෙතත්, සංක්‍රමණිකයන් දැඩි ලෙස කප්පාදු කළහොත් ප්‍රාදේශීය විශ්වවිද්‍යාල, ගොවිපොළ, රෝහල් සහ වැඩිහිටි සත්කාර මධ්‍යස්ථානවල සේවක හිඟය තවත් උග්‍ර විය හැකි බවට රජය අනතුරු අඟවනවා.