ලේබර් රජය ප්‍රකාශයට පත් කළ නව සංක්‍රමණ ප්‍රතිපත්තියට ව්‍යාපාරික සහ පතල් කර්මාන්ත අංශ සහය පළ කර තිබෙනවා.

ශුද්ධ විදේශ සංක්‍රමණය දැනට පවතින 292,000ක පමණ මට්ටමේ සිට වසරකට 225,000ක් දක්වා අඩු කිරීම රජයේ ඉලක්කයයි.

විදේශීය සිසුන්ගේ වීසා මාරු කිරීම පාලනය කිරීම, සංචාරක වීසාවලට “No Further Stay” කොන්දේසිය එක් කිරීම සහ වීසා කාලය ඉක්මවා රැඳී සිටින පුද්ගලයන්ට එරෙහිව පියවර ගැනීම සැලැස්මට ඇතුළත්.

පතල් සහ නිවාස ඉදිකිරීම් ක්ෂේත්‍ර පවසන්නේ පුහුණු විදේශීය සේවකයන්ට ප්‍රමුඛත්වය ලබාදීම රටේ සේවක හිඟය අවම කිරීමට උපකාරී වන බවයි.

කෙසේ වෙතත් Working Holiday වීසා සීමා කිරීමෙන් අස්වනු නෙළීම සඳහා අවශ්‍ය සේවකයන් සොයාගැනීම අපහසු වන බව ගොවි සංවිධාන පවසනවා.

මේ හේතුවෙන් ආහාර නිෂ්පාදනයට, ප්‍රාදේශීය ආර්ථිකයට සහ ආහාර මිලට බලපෑම් ඇතිවිය හැකි බවට ඔවුන් අනතුරු අඟවනවා.

සංචාරක, හෝටල් සහ ආපනශාලා ක්ෂේත්‍රද නව සීමා හේතුවෙන් දැනට පවතින සේවක හිඟය තවත් බරපතළ විය හැකි බව පෙන්වා දී තිබෙනවා.